Shillong, Rymphang:
U Myntri Rangbah ka jylla, Conrad K Sangma, ha ka Lah Sngi U Blei u la pyntip hapoh ka ïingdorbar ba ïa ka kam ri jingri yn nym lah ban ithuh kum ka kam karkhna katba ka Food Processing pat ka hap ne la ithuh kum ka karkhana.
U Myntri Rangbah u la pyntip ïa kane haba jubab halor ka jingkylli kaba la wanrah da u MLA ka UDP na Mawkyrwat u Bah Renikton L Tongkhar ha ki kynta kylli jingkylli.
Haba jubab ïa ki jingkylli bynrap, u Myntri Rangbah u la ong, wat la ym shym la ithuh ïa ki kam ri jingri kum ka karkhana, hynrei na ka liang jong ka sorkar ka lah pat ba kan ai ka jingïarap ïa kiba ri jingri lyngba ki prokram bapher bapher ba la wanrah da ka Sorkar.
Ha kaba ïadei bad ka jingkylli ba kwah ban tip ïa ki subsidy ba ai ïa ka kam ri jingri, u Conrad u la ong ba ïa ka prokram ka dei kaba dang shu sdang ha u snem ba la leit noh ha kaba ka Sorkar ka la sam ïa ki ‘niang khun, khun syiar sha ki nongrep bapher bapher.
U Myntri Rangbah u la pyntip ruh ba ka jingïarap kaba kham kongsan sha ki nongrep ha ki kam ri jingri ka dei na ka CM-Elevate, ha kaba ka Sorkar ka la ai ïa ka subsidy kaba heh duh khamtam sha ki kam ri jingri jingdup kaba long haduh 50%.
U la ïathuh ruh ba lyngba ka skhim CM-Elevate, tang hapoh 2 bnai ka Sorkar ka la ïoh pdiang palat 30, 000 tylli ki aplikeshon hapoh ka CM-Elevate.
U la ong ba napdeng kine ki 30,000 tylli ki aplikeshon ba la ïoh pdiang ha ka CM-Elevate, haduh 20,000 tylli ki dei jong ka kam ri jingri bad pyntip ruh ba ka jingai subsidy hapoh ka CM-Elevate ka long ba ka Sorkar kan ïarap haduh 50% na ka bai seng ne ka subsidy.
Halor ka jingkylli balei ka Sorkar kam ai lang kajuh ka jingmyntoi ba la ai hapoh ka Industrial Policy sha ki nongri jingri, u Myntri Rangbah u la ong, “Ka daw hi ka long ba ka kam ri jingri ka dei ka kam ri jingri bad ka kam karkhana ka dei ka karkhana katkum ki jingbatai bad kumta, ym lah satia ban pynïakhleh”.
Pynban ha kawei ka liang u la pyntip ba ka Sorkar ka la ai jingkyrshan ïa kiba bun sha ki nongrep hapoh ka Jylla ha kaba ka la dep ban sam 100 tylli ki kali Pick-up ban pynkit ïa ki mar-rep jong ki nongrep bad mynta kan sa sam sa kumba 500 tylli ki kali na ka bynta ki nongrep ban kit mar.
