Shillong, Rymphang:
U MLA ka Congress na Mawhati, Bah Charles Marngar ha ka Sngi Ba-ar u la kyrpad ïa ka Sorkar ban pynïeng ïa ki ‘Disability Centre’ ha man la ki distrik hapoh ka Jylla na bynta ka jingmyntoi jong ki briew kiba don jingduna ha ki dkhot met.
“Haba phai sha ka tnad Social Welfare, ka don ka jingdonkam kaba kyrkieh ban pynïeng ïa ki Jaka Pdeng na bynta ki briew kiba don jingduna ha ki dkhot met ha ki distrik bad ka imlang-sahlang,” la ong u Bah Marngar haba ïashim bynta ha ka jingïakren halor ka Mang Tyngka hapoh ïingdorbar thawaiñ.
U la ong ruh ba ki briew kiba don jingduna ha ki dkhot met ki mad ïa ki jingeh bapher-bapher bad kumta ki donkam ïa ka jingphai khmat kaba kyrpang ban pyntikna ïa ka jingshah kynthup bad ka jingïoh bynta lang ïa ki lad jingmyntoi.
Haba kdew ba ki don tang 4 tylli ki District Resource Centre – Shillong, Jowai, Nongstoiñ bad Tura kiba la pynïeng ban shakri ïa ki jingdonkam, u MLA u la pynpaw ka jingsngewkhia ba ka dang don ka jingbym biang ha ki lad jingkyrshan ha kiwei pat ki distrik jong ka Jylla – kaba ïalam sha ka jingduna ha ki jingdon-jingem bad jingïoh bynta lang na bynta kito kiba don jingduna ha ki dkhot met.
“Da kaba wanrah ïa ka ‘Disability Centre’ ha ka kyrdan jong ki distrik, ngi lah ban weng ïa kane ka jingeh bad pynbiang ïa ka jingkyrshan ba donkam ha ryngkat ki jingdon-jingem na bynta ki briew ba don jingduna ha ki dkhot met,” u la ong.
U Bah Marngar u la ong ruh ba ka ‘Disability Centre’ ha kyrdan jong ki distrik kan shakri kum ka lad jingïarap na bynta kito kiba don jingduna ha ki dkhot met ban ïoh bynta ha ki jingdon-jingem bad ki lad jingkyrshan kiba donkam.
Ha kajuh ka por, u la ong ba kane ka jaka kan kyntiew ïa ki jingpynsaphriang jingtip bad ka jingkyrshan bad yn sa lah ruh ban pynsaphriang jingtip halor ki hok bad jingdonkam jong ki briew kiba don jingduna ha ki dkhot met ha ka imlang-sahlang.
“Kane ka Jaka Pdeng ka lah ban long kum ka rynsan ka ban hikai ïa ki paidbah halor ka jingdonkam ban kynthup bad ioh bynta lang, ban pynbiang ïa ki lad jingkyrshan bad jingshakri ba kyrpang,” u la ong da kaba bynrap ba kane ka jaka kan ïarap ruh ha ka ban pynbiang ïa ki tiar katkum ka juk stad teknoliji, ban pynneh-pynsah ïa ka jinglong-jingman ha ka jingim bad ka jingïasyllok na bynta ki briew kiba don jingduna ha ki dkhot met.
Kumjuh, kane ka jaka kan tyrwa ruh ïa ki prokram ban pynwandur ïa ki sap ki phong jong ki, prokram ai jinghikai nalor kiwei-kiwei.
Haba pynsngew ba ki briew ba don jingduna ha ki dkhot met ki ju mad ïa ka jingshah ñiewbeiñ, u MLA u la ong ba da kaba pynïeng ïa ka ‘Disability Centre’, yn sa lah ban wanrah ïa ka basa jingim kaba kynthup lang na bynta jong baroh ban ïasnohkti kumjuh ban ïashim bynta lang ha ki kam jong ka imlang-sahlang.
Shuh shuh u la ong, “Nga kyrpad ïa ka Sorkar ban sngewbha pynïeng ïa ki ‘Disability Centre’ ha man la kawei-pa-kawei ka distrik. Kumba nga la kdew ba haduh mynta, ngi don tang 4 tylli ki Resource Centre – Shillong, Nongstoiñ, Jowai bad Tura.”
“Ka la dei por ïa ka Sorkar Jylla ban shim ki sienjam ba kyrkieh na bynta ban pynïeng ïa ki ‘Disability Centre’ ha man la ki distrik na bynta ki lok ba kyrpang jong ngi ba don jingduna ha ki dkhot met kiba don hapoh ka Jylla,” la ong utei u nongmihkhmat.
