Khliehriat, Rymphang:
Ka shlem treikam u General Manager, District Commerce & Industries Centre (DCIC), East Jaiñtia Hills District, Khliehriat ha ka 27 tarik ka la pynlong ïa ka District Level Industrial Exhibition ne ka ïew ïadie ïathied kaba ar sngi ha Khliehriat East Parking Lot.
Ïa kane ka ïew ïadie ïathied la plie da u Deputy Commissioner ka East Jaiñtia Hills District u A Baranwal kum u kongsan, ha ka jingdonlang u General Manager DCIC Bah HN Kharpuri, ki Functional Managers, DCIC, Bah G Pala bad u Bah P Suja, u District Project Manager (DPM), NRLM East Jaiñtia Hills District, Bah K Slong, ki waheh Shnong bad ki nongseng kam lajong napoh ka District. U Deputy Commissioner ha ka jingkren, u la ïaroh ïa ka shlem treikam District Commerce & Industries Centre, Khliehriat halor ka sienjam bad ka jinglah ban pynlong ïa kane ka ïew pyninam kaba long ka rynsan ïa ki nongseng kam lajong bad ki ‘riew don sap ban pyni ïa la ki sap ki phong ki jong ki.
U la kyntu ruh ïa ki nongseng kam lajong ba kin trei shitom bad minot thop bad ban nangpynjanai shuh shuh ïa ki kam ba ki leh khnang ban kyntiew ïa ka ïoh ka kot ka jong ki. Shwa kane u General Manager DCIC Bah HN Kharpuri, u la ïathuh ba ka ka jingthmu jong kane ka ïew ïadie ïathied, ka long ban ailad ïa ki nongseng kam lajong ban pyni ïa la ka sap ka phong, lyngba ka kam kaba ki trei bad ban ai mynsiem ruh ïa kiwei ba kin kyntiew ïa la ka ïoh ka kot lyngba ka kam lajong bad ban shimkabu ïa ki lad jingkyrshan jong ka sorkar lyngba ka tnat Commerce & Industries. Ha kane ka ïew ïadie ïathied, la sakhi ïa ka jingdon ki dukan bapher bapher kiba kynthup ïa ki dukan die jingbam, ki dukan kiba die ïa ki jingshna bad jingbuh jingsat ba la oh shrong na ki dieng bad siej, ki dukan die jaiñ bad kiwei kiwei de ïa kiba la buh da ki nongseng kam lajong bad ki tnat sorkar kumjuh.
