Nongstoiñ, Rymphang 28
Ka Ri Khasi Sepngi Federation (RKSF) ha ka Sngi Balang ka la ïoh ban aiti ïa ka dorkhas sha ka Myntri ka koit ka khiah ka Jylla ka Kong Ampareen Lyngdoh ban dawa kyntiew kyrdan ïa ka Rambrai PHC sha ka CHC.
U President ka RKSF, Bah Mawkordor Kharsyiemlieh u la ong, ha katei ka dorkhas ba la aiti da ka seng sha ka Myntri la dawa ba dei ban kyntiew kyrdan noh ïa ka PHC Rambrai sha ka CHC khnang ba ki paidbah nongshong shnong jong ka thaiñ Rambrai kin ïoh ïa ka jingshakri kaba biang namar haduh mynta ka dang dei tang ka PHC bad kam pat lah ban ai ïa ka jingshakri kaba pura.
U Bah Mawkordor u la ong ruh ba ha katei ka dorkhas, ka seng ka la kyntu jur ïa ka Myntri ba kan shim khia ban leh eiei noh ïa katei ka jaka sumar khnang ba kan long ka jingmyntoi ïa ki paidbah jong ka thaiñ.
Kumta na ka liang utei nongïalam ka RKSF, u la pyntip ba ha kane ka jingïakynduh ïa ka Myntri, ka la kular ban shim khia ban peit bniah ïa katei ka PHC.
