Shillong, Rymphang 28
U nongïalam ka Liang Pyrshah jong ka ïingdorbar thawaiñ bad MLA ka Congress, Bah Ronnie V. Lyngdoh u la ong ba ki jingkynnoh u MLA ka BJP, Bah Sanbor Shullai pyrshah ïa u MP ka Shillong, u Bah Vincent H. Pala ki long ki bym shisha.
“Sa wad ma phi, katno sien u Bah Sanbor Shullai u la wan sha ïingdorbar thawaiñ bad katno sien u la kren hapoh ïingdorbar thawaiñ,” la ong u Bah Lyngdoh haba kren sha ki lad pathai khubor ha ka Sngi Balang.
Haba kdew ba u Bah Pala kum u MP u la leh ïa kiba bun ki kam, u MLA u la ïathuh ba u Bah Pala u long u briew uba jar-jar bad u bym ju da kwah paw than kumba long ki katto-katne ki ‘riew saiñ pyrthei.
“Kiba bun ki kam kiba u la leh na bynta jong ngi, kiba bun ki projek kiba la pyntrei hapoh ka Jylla ka dei namar ka jingtrei shitom jong u. Hooid, u la kren hapoh ïingdorbar Parliament, hynrei ka jingkynnoh jong u Bah Sanbor ka long ka bym shisha namar ma u ïalade um ju da kham kren hapoh ïingdorbar, um ju da kham wan sha ïingdorbar,” u la ong.
Ha kajuh ka por, u la ong, “Hato phi la ïohsngew ïa u (Bah Sanbor) ba un kren hapoh ïingdorbar?…hooid u la wan, hynrei tang da kaba shu wan sha ïingdorbar bad ym kren eiei, ka bha ba u shong beit ha ïing, kan jin da la bha ba u shong ha ïing.”
Shuh shuh u la bynrap ba ka jingkynnoh jong u Bah Shullai ka long ka bym shisha namarba um ju bud ïa ki kam kiba ïaid ha Parliament ha kaba u Bah Vincent H. Pala, MP ka Shillong u la ïashim bynta hapoh ïingdorbar ban pynsngew ïa ki mat kiba ktah ïa ka Jylla.
Na ka liang u nongaiktien bad National Media Coordinator ka Congress jong ka thaiñ Shatei Lam Mihngi, u Mathew Antony u la ong ba shen u MP ka Shillong un sa don ka jingïakynduh bad ki lad pathai khubor halor ka jingïashim bynta jong u ha Parliament.
“U Bah Pala u la kylli 235 tylli ki jingkylli hapoh Parliament bad ngin sa pynsngew ïa ki kam jong u ha ka rukom kaba dei bad ba bniah,” u la ong.
Kum ban shu kdew hangne, u Bah Sanbor u la ong ba ki paidbah ka Shillong Parliamentary konstitwensi ki la dei ban kylla noh ha kane ka kynti kaba mynta bad ym ban pynjop sah ïa u Bah Vincent Pala namar la 5 snem kynthih, u Bah Pala u la shu ktha soh-ot ha kyndong hapoh Parliament khlem da wanrah ïa ka roi ka par.
