Shillong, Rymphang 28
Ka Bharatiya Janata Party (BJP) Meghalaya ka la sdang ïa ka prokram ban lum ïa ki jingai jingmut na ki paidbah ka jylla kaban sa kynthup ha ki mat treikam ne Manifesto jong ka seng na ka bynta ka ilekshon MP ka ban sa long.
Ïa kane ka prokram la sdang naduh ka Sngi Ba-ar ha kaba u President ka BJP Meghalaya u Rikman G Momin u la thep nyngkong eh ïa ka jingai jingmut jong u.
Ka BJP ka ïawer ïa ki nongshong shnong ka jylla ba kin phah ïa ki jingai jingmut lyngba ki jingthoh jong ki sha ka NaMO app ne da kaba shu ‘miscall’ ha u number 9090902024.
Ki seng trei mon sngewbha bapher bapher ruh ki lah ban phah ïa ki jingai jingmut jong ki da kaba ai da ka jingthoh sha ka shlem treikam jong ka seng ha ki district ne ha ka shlem treikam jong ka seng ha ka jylla.
Ha ka jingkren jong u President, u la ban jur ba ka BJP ka ngeit ba ha ka synshar paidbah, ki nongshong shnong ki dei ban mih shakhmat ban pynsngew ïa ki jingsngew jong ki bad khamtam ïa ki jingangnud. Ka BJP kum ka seng saiñ hima sima ka pdiang ïa kita baroh bad dei tang ka BJP ha baroh kawei ka ri kaba ïaid ryngkat lang bad ki paidbah ha ka ban shna ïa ki mat treikam jong ka.
Lyngba kane ka prokram, ka BJP ka kwah ban trei da kaba ïoh ïa ka jingmynjur na ki paidbah. Bun bah ki jingangnud jong ka jylla bad ka BJP ka ailad ïa iwei-pa-iwei nongshong shnong ban ïa ai jingmut. Ka seng ka la buh jingthmu ban pynpoi haduh 5000 tylli ki jingthoh halor ki mat bapher bapher kum ka jingithuh ïa ki ktien ka jylla ha ka Khyrnit kaba Phra, ka jingseng ïa ki Medical College, ka jingpynkiew ïa ki lad ai jingsumar, ka jingpynmih kam mih jam na ka bynta ki khun samla bad kumta ter ter.
