Shillong, Rymphang 28
Ki samla pule ki ban sa ïakhun ïa ka eksamin Secondary School Leaving Certificate (SSLC) bad Higher Secondary School Leaving Certificate (HSSLC) ki la jan kot 90 hajar ngut mynta u snem.
Ha ka eksamin SSLC, kin don 55,189 ngut ki ban sa ïakhun, bad ha ka eksamin HSSLC ki samla pule ki ban sa ïakhun kiba kynthup na ka Arts, Science bad Commerce, Vocational ki long 34,335 ngut. Lada kheiñlang, baroh ki samla pule kiba ïakhun ïa kine ki ar tylli ki eksamin ki long 89,524 ngut mynta u snem.
Kine baroh ar tylli ki eksamin kiba pynlong da ka Meghalaya Board of School Education (MBoSE) kin sdang ha ka 1 tarik bad 4 tarik u Lber.
Ki jaka thoh eksamin ki don 159 tylli na ka bynta ka eksamin SSLC bad 108 tylli na ka bynta ka eksamin HSSLC ha baroh 12 tylli ki district.
Na ka liang u Myntri ka tnat pule puthi u la kitbok kitrwiang ïa baroh ki samla pule kiba la pynkhreh ban leit thoh eksamin bad u kyrmen ba kin lah ban lehbha da kaba pynleit jingmut bha ha ka jingpule bad buh sharud ïa ka mobile phone. Haba kren ai mynsiem, u Rakkam u la ong ba kum ki samla pule ki dei maki kiba wanrah burom bad jingsarong ym tang ïa ka jaka pule bad ïalade, hynrei ïa ka jaitbynriew bad ki kmie ki kpa.
