Shillong, Rymphang 28
Ki pulit ka Ri Bhoi ha ka Sngi Balang ki la pyntip ba ka jingpynkhreh ïa ka ‘Chargesheet’ lane ka jingmudui ban ai sha ïingbishar pyrshah ïa kiba donkti ban pynïap dusmon ïa uwei u heprit ba dang 10 snem ka rta ha ka shnong Umtyngar.
Katkum ka tyllong khubor ba la ïohlum, la ong ba kan shimpor sa tang katto-katne taïew ban pynkhreh ïa katei ka jingmudui.
Lah ban kdew ba ki pulit ki la kem ïa arngut ki briew ha kaba ïadei bad ka jingshah pynïap jong utei u heprit.
Ki pulit ka Ri-Bhoi ki la lap ïa ka daw jong ka jingshah pynïap jong utei u heprit, bad ka daw ka long namar ba u la shim ïa u bilor kyiad jong uwei na kiba la shah kem halor ka jingpynïap dusmon ïa u.
Katkum ka jingphla jong kiba la shah kem, ka jingshah pynïap jong utei u heprit ka long namar ba u Banshngaiñ Tynsong, uba long uwei na kiba la shah kem, u la bitar ïa une u heprit ba u la shim ïa uwei u bilor kyiad.
Lah ban kdew ba ha ka 19 tarik Rymphang, ki pulit ki la ïoh ïa ka jingujor ha kaba la pyntip ba ha ka 18 tarik Rymphang, la lap ïa ka metïap jong utei u heprit na ka kper jong uwei u nongshong shnong ka Umtyngar.
Utei u heprit u la jah rngai naduh ka 17 tarik Rymphang, bad na ka liang ki pulit ki la pynrung ïa katei ka jingujor ha thanat Patharkhmah hapoh ka kyndon 302 jong ka Indian Penal Code (IPC).
Haba sdang jong ka jingtohkit, ki pulit ki la kem ïa arngut ki briew ba la suba ba ki la donkti ban pynïap ïa utei u heprit bad kine ki kynthup ïa u Pynshailang Warjri, 32 snem ka rta, bad u Banshngaiñ Tynsong, 28 snem. Kine baroh ar ki dei kiba sah ha ka shnong Umtyngar.
Ynda la tohkit ïa kitei arngut kiba la shah kem, ki pulit ki la ïathuh ba kitei ki la phla ba utei u heprit u la sah ha ka ïing skum kaba dei jong uwei na kine ki arngut ha ka miet jong ka 17 tarik Rymphang.
Ha ka step jong ka 18 tarik Rymphang, ki pulit ki la ong ba utei u heprit u la pyrshang ban phet krad da kaba rah artad ïa u bilor kyiad jong uwei na kitei ki arngut.
Namar ka jingbitar halor ka jingleh jong utei u heprit, ki pulit ki la ong ba u Banshngaiñ bad sa uwei pat u paralok jong u, ki la beh thong ïa utei u heprit. Hadien ba ki la ïoh bat ïa utei u heprit, ki pulit ki la ong ba u Banshngaiñ bad sa u paralok jong u ki la pynïap ïa utei u heprit da kaba set op ïa ka shyntur jong u.
Ki pulit ki la ong ba hadien ba la pynïap ïa utei u heprit, u Banshngaiñ bad u paralok jong u, ki la buhrieh ïa ka met jong utei u heprit ha kawei ka khlaw bad ki la ap haduh ka por mynmiet ban kynriah ïa ka met sha ka kper jong uwei pat u nongshong shnong ka Umtyngar.
Na ka liang ki pulit ki la kem noh ïa utei u paralok jong u Banshngaiñ.
Kumba ka long haduh ba ai ïa kane ka khubor, ki pulit ki la ïathuh ba u Banshngaiñ u don hapdeng ka jingshah sumar ha ‘hospital’ namar ka jingshitom ha ka met.
