Shillong, Rymphang 28
Ka Congress ha ka Sngi Balang ka la ther tyngeh ïa ka Sorkar BJP hapoh ka jingïalam u Narendra Modi bad kynthoh ruh ïa ki 10 snem ka jingsynshar ka seng kum ki ’10 snem jong ka jingleh bym hok’.
“Ngi don ha ki bnai khatduh jong ka samoi treikam ba-ar jong ka Sorkar BJP hapoh ka jingïalam u Narendra Modi – ka Sorkar kaba bamsap tam, ïa kaba yn sa tip ha ka histori kum ka Sorkar kaba leh shiliang bad kaba la pyntyllun ïa ki jingleh bym hok, iwei-hadien-iwei sha ki paidbah ka ri,” la ong u nongaiktien bad National Media Coordinator ka Congress jong ka thaiñ Shatei Lam Mihngi, u Mathew Antony haba kren sha ki lad pathai khubor.
“Ngi khot ïa kane – ki 10 snem jong ka jingleh bym hok,” u la ong.
Haba pynkynmaw ba u Myntri Rangbahduh ka ri u la kular 2 klur tylli ki kam man u snem kum ka jingkular ynda la wan ha ka bor, u Antony u la ong ba katkum ki jingkheiñ ba dang pyllait thymmai, ka jingkyrduh kam hapdeng ki ‘Graduate’, ‘Post Graduate’ bad ki ‘PhD’ ka long kumba 33.6% katba ka jingkiew jong ka jingkyrduh kam ka long 44% hapdeng kiba 20-24 snem ka rta.
“Ha ka por jong ka Sorkar UPA, ngi la pynbiang 75 lak tylli ki kam man u snem haduh 2012 katba ka BJP kam shym la lah pynbiang tang 29 lak tylli ki kam man u snem haduh 2022,” u la ong.
Haba phai sha ka jingkiew ka dor ka mur, u la ong ba ka BJP ka la leh ‘drama’ ha surok ha ka por ba ka dor jong ka LPG ka long kumba ` 290 haduh ` 400 na bynta kawei ka tyndong shet jingshet (2012-2014) katba mynta pat, ka dor ka long hapdeng ` 900 haduh ` 1,100.
U la ong ruh ba ha u snem 2014, ka dor jong ka umphniang kali ka long ` 71 shi litar – mynta ka la kiew sha ka ` 97 shi litar katba ka ‘Diesel’ ka la kiew na ka ` 55 shi litar sha ka ` 86 shi litar.
“Hato kane kam dei ka jingleh bym hok ïa ki paidbah ka India. Hato ki nongïalam ka BJP ki thrang bor bad bamsap haduh katta-katta haduh ba kim don jingsngew shuh wat ïa ka jingud-jingnam jong u paidbah,” la buh jingkylli utei u nongïalam.
Haba ïadei bad ka jingeh jong ki nongrep, u la kynnoh ba ar snem mynshuwa, 700 ngut ki nongrep ki la ïap ha ki kyndon ba la wanrah da ka Sorkar hapoh ka jingïalam ka BJP haba ki la ïakhih halor ki 3 tylli ki ‘aiñ ïong’ (3 Black Laws).
Ha kajuh ka por, haba kdew ïa ki kam be-aiñ pyrshah ïa ki SC, ST bad OBC kiba la kiew da 48% ha u snem 2022, u la ong ba ki kam thombor pyrshah ïa ki kynthei ka la kiew sha ki kyrdan jong 31,516 tylli ki kam be-i-jot ba la pynngat mukotduma ha u snem 2022.
Halor ka jingshah ban beiñ ki rit paid, u Antony u la ong ba 386 tylli ki shlem jong ki kynhun niam bapher-bapher ki la shah pynjulor bad 70,000 ngut ki briew ki la sakma na la ki ïing ki sem.
Nalor kane, haba pynpaw ka jingsngewkhia halor ka jingïakynad ha Manipur, u la ong, “U Myntri Rangbahduh u don por ban ïakren halor ka suk ka saiñ na bynta ka Ukraine, ban ïashim bynta ha ka mat jong ka Israel bad Palestine, ban shang kylleng pyrthei bad ka ri na bynta ban ïalap ilekshon, hynrei um don por na bynta ka Manipur.”
Shuh shuh u la bynrap ba ka BJP ka la thom ïa ka jinglong laitluid jong ka ‘Judiciary’, Election Commission, kynhun tohkit ka Sorkar Pdeng bad ka jingtreikam laitluid jong ki lad pathai khubor.
“Kane ka dei ka por ïa ki nongshong shnong ka India ban pynsawa ïa ka sur bad jied ïa ki nongmihkhmat bad ka Congress kum ka lad ban ïoh ia ka ri kaba suk ba saiñ bad kaba kiew irat,” la ong u Antony.
