Shillong, Rymphang 28
Ka seng National People’s Party (NPP), kaba long kawei na ki ‘National Party’ ha ka Ri, ka la sakhi ïa ka jingkiew ha ka jingïoh pisa ha ka shi snem, kata, na ka T. 47.20 lak ha u snem 2021-22 sha ka T. 7.562 klur ha u snem 2022-23.
Kine ki long katkum ki jingkheiñ jingdiah na ka kynhun Association for Democratic Reforms (ADR) kaba la lum jingtip halor ka jingïoh pisa ki hynriew tylli ki seng saiñpyrthei ki baheh (National Party) ba kynthup ïa ka Bharatiya Janata Party (BJP) Indian National Congress (INC), Bahujan Samaj Party (BSP), Communist Party of India (Marxist) CPI (M), Aam Aadmi Party (AAP) bad ka NPP.
Hapdeng u snem 2021-22 bad 2022-23, ka jingïoh pisa jong ka BJP ka la kiew da 23.15% (` 443.724 klur) na ka T. 1,917.12 klur sha ka T. 2,360.844 klur.
Ka AAP ka la kiew ha ka jingïoh pisa da 91.23% (T. 40.631 klur) na ka T. 44.539 klur sha ka T. 85.17 klur ha ka shi snem.
Hynrei ka jingïoh jong ka Congress, CPI (M) bad BSP ka la hiar hapdeng ka shi snem da 16.42% (T. 88.90 klur), 12.68% (T. 20.575 klur) bad 33.14% (T. 14.508 klur).
Kitei ki seng ki la pynbna ba kham bun na ka jingïoh pisa ka dei lyngba ka jingsynñiang. Ka BJP ka la pynbna ba ka jingsynñiang ba ka la ïoh ka long T. 2,120.0642 klur, Congress (T. 268.6278 klur), AAP (T. 84.3416 klur), CPI(M) (T. 63.783 klur) bad ka NPP T. 7.523 klur.
Ha kaba ïadei bad ka jingpynlut, ka NPP ka la pyni ba na ka T. 7.562 klur ha u snem 2022-23, ka la pynlut ` 6.932 klur lane 91.67%. Ka NPP ka la pynbna ruh ba ka pynlut 95.54% na ka jinglut baroh ha u snem 2022-23 ha kaba ïadei bad ka ilekshon. Namarkata, ka NPP ka la pynlut ` 6.623 klur ha ka ilekshon.
Lah ban kdew ba ki seng saiñpyrthei ki don shibun ki tyllong ba ki ïoh jingkyrshan pisa. Ha u snem 2014, ka Election Commission of India (ECI) ka la bthah ïa baroh ki seng saiñpyrthei ba kin phah ïa ki kaiphod ba la dep ban peit bniah da ki Auditor ha kaba ïadei bad ka jingïoh bad ka jingpynlut pisa.
