Shillong, Rymphang 28
U General Secretary ka Khasi Student’s Union (KSU) Sengkmie, Bah Donald V. Thabah u la ong ba kum ka seng ka la kynmaw tympang biang ïa ka sngi jong ka 28 tarik u Rymphang 2024 halor kaei kaba la jia ha ki 4 snem mynshwa ha kaba u dkhot ka KSU, u Bah Lurshai Hynñiewta u la shah dkhat jubor ka jingim hadien ba ki nong Bangladesh ki la hiar thma pyrshah ïa ka seng ha ryngkat ki tiar pynmynsaw ha Ichamati ïa kaba la tip mynta kum ka Pyntha-umdan.
Kum ban shu pynkynmaw ba katba ka seng ka dang pynlong ïa ka jingïalang pynsngewthuh paidbah halor ka jingktah jong ka aiñ Citizenship Amendment Act (CAA) bad ruh ka jingdawa ban pyntreikam noh mardor ïa ka Inner Line Permit (ILP) hapoh ka jylla Meghalaya ha u snem 2020, ki nong Bangladesh ki la wan hiar kynsan shapoh katei ka jaka hadien ba la wai katei ka jingïalang jong ka seng ha kaba ki la bom bad tied naphang ïa ki nongwan ïashimbynta bad ki dkhot ka seng kiba dang don ha katei ka jaka. Hynrei kaba sngewsih ka long ba u Bah Lurshai Hynñiewta u la mad ha katei ka apot shah bom shah tied ha kitei ki nong Bangladesh haduh ba un da mynsaw jur bad khlad noh na kane ka sla pyrthei.
Haba ïakren bad ki lad pathai khubor ha ka 28 tarik u Rymphang 2024 kaba dei ka sngi dap 4 snem jong u Bah Lurshai Hynñiewta, na ka liang u Bah Donald u la ong ba ka jinghiar thma jong ki bar jylla ïa ka seng ha katei ka por ka pyni ba kim pdiang ïa ka jingpyntreikam ïa ka ILP hynrei ki la pdiang sngewbha pynban ïa ka CAA bad u la ong ba kitei nong Bangladesh ki khlem kren da ka ktien hynrei ki la pyni pynban da ka kam.
U Bah Donald u la pynkynmaw ruh ba kum ka seng ka la pynlong ruh ïa ki jingïakhih bapher-bapher kum ka dak ka jingpyrshah halor ka jingjia shah dkhat jubor ka jingim jong u Bah Lurshai. Na ka liang ka sorkar ka la pynjari da ki kyndon aiñ bapher-bapher hynrei watla katta ruh ka seng ka dang ïai bteng na ka por sha ka por ban trei ïa ka kam bad kum ka seng kam tieng ne kam riej hynrei kin ïaid beit shakhmat da kaba leit khynra ïa ki kot ki sla jong ki mynder ri kiba shong ba sah ha ka thaiñ Pyntha Umdan bad ki shnong kiba marjan.
U Bah Donald u la ïathuh ba manla u snem, ka KSU ka ju leit ban leh burom ïa ka jaka kaba u Bah Lurshai u la kyllon ïap ha ka jingïaleh bad ka seng ka la tei ruh ïa u motdur sahnam jong utei u riewïaleh u ba la aiti ïa la ka jong ka jingim na ka bynta ka Jaitbynriew.
“Mynne ka sngi ruh, ki dkhot bad ki nongïalam jong ka KSU South Khasi Hills District Unit kiba kynthup ïa ki thaiñ Sohra, Shella bad kumta ter-ter ki la pynlong ka jingïalang hakhmat u motdur jong une u riewïaleh bad ki la ai jingkren kiba bun rukom ban pynsngewthuh ïa ki paidbah ba hapdeng ka jingduhnoh ïa u dkhot, kim dei ban duh mynsiem hynrei ngi hap ban bteng ban ïaleh bad dawa ban ïoh ïa ka Inner Line Permit bad kumjuh ruh ba ngin ïeng pyrshah beit ïa ka Citizenship Amendment Act”, la ong u Bah Donald.
Halor ka jingkem ïa kiba donkti ban dkhat jubor ïa u Bah Lurshai, u Bah Donald u la ïathuh ba tad haduh ki sngi ka seng kam pat ïoh jingshai ha kaba ïadei bad ka jingkem ïa kitei ki briew kiba donkti hynrei la shu ïoh jingtip ba ki don 8 ngut kiba suba donkti bad kitei ki 8 ngut kiba lah shah kem ruh ki lah lait noh.
“Ka jingtohkit ter-ter haduh mynta ngim pat ïoh kino-kino ki ksai ban ong ba ki la ïoh ban kem ïa kino-kino kiba donkti hangto”, la ong u Bah Donald.
U Bah Donald u la ïathuh ba katkum ki dur khih jong ki briew kiba la saphriang ha ka por ba ki la wan ban bom ban tied ïa ki dkhot ka seng bad lyngba ka jingïakren bad ki dkhot jong ka seng na sha kitei ki thaiñ, ki la ong ba kitei ki briew kiba donkti ki ju ïaid, ïeng bad ki trei ki ktah beit kumba ju long manla ka por. “Na ka liang ka seng lem bad kiwei ki sengbhalang ruh, ngi la ïaleh katba lah ban khanglad ïa ki mynder bad ki barjylla ba kin kamai-kajih shathie namar ba lyngba ka kamai kajih ki ïohlad shathie ban pynshongshngaiñ ïa ki bad kaba pynbun paid pat ïa ngi”, la ong u Bah Donald.
