Shillong, Jylliew 17
Ka Kong Deity H Majaw kaba dei ka Executive Member jong ka Khasi Hills Autonomous District Council ka la pyntip ba naduh ba ka Sorkar Jylla lyngba ka tnad Social Welfare ka la pynsangeh ban ai syrnod Schedule Tribe (ST) ïa ki khun kiba ai jait sha u kpa, kane ka kam ka la poi sha ïingbishar Meghalaya High Court.
Ka jingjubab ka Kong Deity ka dei ha ki kynta kylli jingkylli ba la wanrah da ka Kong Grace Mary Kharpuri kaba dei ka MDC ka NPP na Nongshken Konstitwensi ha ka dorbar mang tyngka kaba la sdang ha ka sngi Balang ka 17 tarik Jylliew 2026.
Ka Kong Grace ka la wanrah ïa ka jingkylli ba ka Executive Committee kan leh kumno ïa kito kiba pynkheiñ ïa ka Khasi Hills Autonomous District Council (Lineage act, 1997 as amended).
Ka Kong Deity ka la ong ba kino-kino ki bym kam shuh kum ki Khasi yn nym ithuh shuh ïa ki kum ki Khasi.
Ka la ïathuh ruh ba lada ka kmie bad u kpa ki dei ki Khasi ki khun ruh kin dei ki Khasi lada ki ai jait sha u kpa hynrei ka aiñ kam shym la batai shai, kumta kam kwah ban batai jrong namar kane ka dang don ha ïingbishar.
Haba bynrap ïa ka jingkylli, ka Kong Rona Khymdeit kaba dei ka MDC ka NPP na Nongpoh ka la ong ba kito kiba shim jait na u kpa ki lah ne em ban ïoh syrnod Schedule Tribe, ka Kong Deity ka la pyntip ba mynshwa ki ïoh hynrei ha u 2024 ka Social Welfare jong ka Sorkar Jylla ka la pyndam noh namar kam ai syrnod Schedule Tribe ïa ki khun kiba ai jait sha u kpa bad dei na kane ka daw ba kane ka kam ka la poi sha ïingbishar High Court.
Haba bynrap biang ïa ka jingkylli ka Kong Grace ka la ong ba kaei ka kamram jong ka KHADC ban pynshitom ïa kito kiba ïaleh pyrshah, ka Kong Deity ka la pyntip ba ka KHADC ka dang ap ïa ka rai jong ka ïingbishar bad ynda ka la ïoh ïa ka rai ki hap ban ïatai sani bha namar ym lah ban ïakren kat bym pat lah ban ai ïa ka rai.
Shuh shuh ka Kong Grace ka la ong lada ailad ïa ki khun ban shim jait sha u kpa, kan sa kulmar ka riti dustur namar kan sa duh ban khot meikha, ne ñiakha.
Ka Kong Deity ka la jubab ruh ïa ka jingkylli ba la buh da u Bah Ricky Shullai ba ka Kur kan ai jingbit (NOC) lada don ka Tangjait bad ai syrnod Khasi Tribe.
