Shillong, Jylliew 17
Ka komiti u B.P. Katakey ha ka ‘Interim Report’ kaba 38 jong ka sha ka Meghalaya High Court, ka la bthah ïa ka Sorkar Jylla ban thaw ïa ka saiñdur treikam (kaba pura) hapoh 15 sngi ban khang ïa ka jingtih bad jingshalan dewïong be-aiñ ha kylleng ka Jylla.
“Ka jingthaw ïa ka saiñdur treikam kaba pura da ka Sorkar Jylla na ka bynta ka Meghalaya baroh kawei, hapoh 15 sngi, ban khang ïa ki kam tih dewïong be-aiñ kynthup ïa ka jingshalan, ka long kaba donkam haduh katta-katta,” la ong ka kaiphod.
Ka komiti ka la kyrpad ïa ka saiñdur ban kynthup lang ïa ka jingpynithuh ïa ki jaka ba lah ban shah ktah, ban phah briew shuh hapoh ka jingpeit ki ophisar kiba don ka jingkitkhlieh, ban phah kaiphod na ka por sha ka por sha ki Deputy Commissioner bad ki SP, ban buh ïa ki khyrdop talasi bad ki Police Outpost, bad ban ai jinghikai ïa ki ophisar halor ka MMDR Act, ki Rule bad SOP.
“Ka kyndon ban bynshet ïa ka jingkitkhlieh ha ki ophisar/briew, lada jia ba lap ïa kino-kino ki kam tih dewïong be-aiñ, lah ruh ban pynrung lang ha kum kane ka saiñdur treikam, naba khlem da pynlong ïa ki ophisar/briew ban shim ka jingkitkhlieh, ka jingpyntreikam hok ïa kano-kano ka saiñdur treikam lehse kan ym long kaba lah,” ong ka kaiphod.
Halor u dewïong uba la dep ban lilam, ka kynhun ka la bthah, “Ka jingai ïa ki ‘Mineral Transport Challan’ ha kaba ïadei bad u dewïong uba 23,903 MT katkum ka jingpynbiang ïa baroh ki jingtip ba donkam na ka bynta ban ai ïa kum kine ki ‘Challan’, la ai jingbit ban pynkit mardor ïa uta u dewïong (ba la kdew) da ki nongkhlieh dor kiba la jop, na ki jaka pynlang dewïong (ba la buh).”
Kiwei pat ki jingbthah ba kongsan ki kynthup ïa ka jingpynshisha marmet ïa baroh ki jaka pynlang ba la buh kyrpang da ka CIL, ka jingaiti ïa ki jaka pynlang bym pat pyndonkam sha ki trai jaka, ka jingpynshisha ïa ki karkhana ‘Coke’ ha South West Khasi Hills naduh ka 01/01/2026, ka jingbteng ïa ka jingpeit bniah ïa ki tyllong dewïong na ka bynta ki karkhana, ka jingpyndep kyrkieh ïa ka Khliehriat PS Case No. 106(3)2026, ka jingpynithuh ïa ka met kaba la lap ha ka par ba la iehnoh kumto bad ka jingsiew bai lutksan sha ki bahaïing hasem, bad ka jingsiew bai lutksan sha ka ‘riewkynthei bad ki khun jong u Mosaid Ali.
Ka komiti ka la pynpaw ruh ba katba ka tnad Mining & Geology ka la pdiang ïa ki aplikeshon na ka M/S Star Cement Meghalaya Ltd bad ka M/S Star Cement Ltd na ka bynta ban shalan ïa u dewïong, ïa “ka ‘show-cause notice’ ha ka 15/05/2026 la phah tang sha ka M/S Star Cement Meghalaya Limited” bad dawa ban pynshitom mardor pyrshah ïa ki jingpynkheiñ da ka M/S Star Cement Limited hapoh ka SOP, 2024.
