Mairang, Jylliew 17
Ka Deputy Commissioner (DC) ka Eastern West Khasi Hills District ka la buh ïa ka jingpyrkhing kaba tyngeh ïa baroh ki trai kali bad ki nongpynïaid kali khamtam ki kali heh kiba ju kit ïa ki mar kiba ju ïaid sha ki jaka khappud bad sha ki jaka kiba kham pajih na sor, kiba ju ïaid sahuh khlem ki kot ki sla kiba biang bad khlem da don ïa ka High Security Registration Plates (HSRP), ka plate number ba la ithuh da ka Sorkar ka ban pyndait na shakhmat bad na sha kynriang jong ka bynta ba shadien jong ka kali.
Ha ka kyrwoh khubor, ka Deputy Commissioner ka la ong ruh ba kumba ju dei ka rukom ban hap ban leh katkum ka Rule 50 jong ka Central Motor Vehicles Rules, 1989 bad katkum ka jingbthah na ka ïingbishar ka ri India, ka Supreme Court.
Shuh shuh ka la ong ruh, namarkata baroh ki trai kali bad ki nongpynïaid ïa ki kali, la bthah ïa ki ban pyntikna ba baroh ki kali kamai kiba ju ïaid ha ki surok kiba hap hapoh ka Eastern West Khasi Hills District ba ki dei ban don ïa ka Certificate of Fitness lane ka certificate kaba pynshisha ba ka kali jong ki, ka dang biang ne em ban ïaid ha surok kaba long katkum ka kyndon aiñ 56 jong ka Motor Vehicle Act, 1988.
La ong ruh ba ki nongñiah kali ki dei ban bud ryntih ïa ki aiñ khlem da pynkheiñ kyndon ha ka por ba ki ñiah kali.
Ka Deputy Commissioner ha ka kyrwoh kala ong ruh ba baroh ki kali ki dei ban don ïa ka valid Pollution Under Control Certificate (PUC) katkum ka jingbthah hapoh ka kyndon aiñ 190(2) jong ka Motor Vehicles Act, 1988 kynthup ïa ka Rule 115 jong ka Central Motor Vehicle Rules, 1989. Shuh shuh, la bthah ïa baroh ki nongñiah kali bad ki nongpynïaid kali ba ki dei ban rah lang ïa ki kot kali kum ka Registration Certificate, ka Insurance Certificate, PUC Certificate, Driving License jong u nongñiah bad kiwei de ki kot donkam katkum ba la bthah ha ka Motor Vehicle Act, 1988.
Nangta, kala pynpaw ruh ba baroh ki kali ki dei ban pyndait da ka High Security Registration Plates (HSRP) ha ka bynta ba shakhmat bad ha ka bynta ba shadien jong ka kali kaba long katkum ba la bthah ha ka Rule 50 jong ka Central Motor Vehicles Rules, 1989.
Shuh shuh la ong ruh ba la buh ruh ka jingpyrkhing ban nym shah ïano ïano ban shna pynheh ïa ka body jong ka kali la ki dei ki kali rit ne ki kali heh.
Ka DC kala ong ruh ba la leh ïa kane hadien ka jinglap ba don bun ki kali kiba la shna hi ban pynheh ïa ka body jong ka kali khlem da ïoh jingbit, kum ka jingjrong, ka lynter bad ka pyngkiang jong ka body ka kali.
“Kane ka jingshna be-aiñ ïa ka ‘body’ jong ki kali ka long kum ka jingpynkheiñ ïa ka kyndon aiñ 52 jong ka Motor Vehicle Act 1988 bad ka Rules 93 jong ka Central Motor Vehicles Rules, 1989 bad ha kajuh ka por kane ka rukom shna pynheh ïa ka ‘body’ ka buh jingma ruh ïa ka kali bad ïa kiwei pat ki kali ha ka por ba ïaid ha surok,” ong ka kyrwoh khubor na ka Deputy Commissioner.
Na ka liang ka DC kala bthah ïa baroh ki trai kali, bad ki nongpynïaid kali ba lada don ki kali kiba ki la dep ban pynkylla thymmai ïa ka ‘body’ jong ka kali, ba ki dei ban pynkylla biang kumjuh kumba ka wan na ki trai nongpynmih kali.
Kumjuh ruh, kala pynpaw ba kito ki trai kali kiba kwah ban thied tang ïa ka ‘chassis’ jong ka kali kum ki trok, bos, ki dei ban pan jingbit shwa na u District Transport Officer ha shuwa ban shna ïa ka body jong ka kali.
Namarkata, baroh ki trai kali, ki nongpynïaid ïa ki kali, ki nongkhaïi, ki riewshimet la bthah ïa ki ban bud ryntih ïa baroh ki jingbthah bad lada lap ïa kino-kino kiba pynkheiñ kin shah pynshitom katkum ki kyndon aiñ jong ka Motor Vehicle Act, 1988 kynthup ïa ka jinglah ban shah knieh noh ka kali ba ki ñiah, ka kuna bad wat haduh ban da shah set ha along lada i donkam, ong ka kyrwoh khubor na ka Deputy Commissioner.
