Shillong, Jylliew 17
Ha ka sngi sdang jong ka Dorbar Lyiur ka Khasi Hills Autonomous District Council (KHADC) ka la wanrah ïa ka mang tyngka kaba duna T.16.92 lak kaba long na ka bynta jong u snem 2026-27.
Katkum ka jingong u Executive Member ka tnad Finance u Bah Seiborlang Warbah, ka jingmang pynlut ka long T.214,60,09,410 bad ka jingpynmih pisa ka long T.214,43,16,760.
Haba wanrah ïa ka mang tyngka hakhmat ka ïingdorbar u Bah Seiborlang u la ong, “Nga kular ba kane ka Executive Committee kan ym sangeh ban wad ïa ki lad ki lynti ha ka ban pynkiew ïa ka jingpynmih pisa jong ka Council, ban pynjanai ïa ka rukom treikam bad bishar bniah bha ïa ka jingpynlut khnang ba kan long kaba ïaid beit.”
U la kyntu ïa ka Ïingdorbar ban mynjur ïa ka mang tyngka namar ka Vote of Account ba 3 bnai kan sa kut noh ha ka 30 tarik u Jylliew. “Kumba ngi ïa tip baroh, ka Vote on Account ba lai bnai kan kut noh ha ka 30 tarik mynta u bnai, kumta, ka mang tyngka ba pura jong u snem 2026-27 la wanrah hapoh ka Ïingdorbar khnang ban lah pynïaid ïa ka Council” u la ong.
Shuwa ban batai bniah ïa ka mang tyngka, u Bah Seiborlang u la pyntip ïa ka Ïingdorbar halor ki sienjam ban ïada ïa ka khyndew ka shyiap jong ki Raid, ki Hima bad ki Shnong ki thaw. “Ka Executive Committee ka la shim ïa ki sienjam ban buh da ka kyndon halor ki jaka ka Raid hadien ka jingshem ïa ka jinglut ki jaka ki Raid lyngba ka jingai sha ki riew shimet bad ki kompeni, kaba la ïaid da ki phew hektar. Kane ka buh ha ka jingma ïa ka lawei jong ki pateng ban wan jong ngi haba ïadei bad ki jaka ban rep ban riang lane ban shong ban sah, khamtam na ka bynta kiba duk bad kiba kyrduh” ula ong.
Namar kata u la ong, ban ïada bad tyngkai ïa ki jaka ki Raid, ka Executive Committee ka la rai ban pynjari da ka kyndon halor ka jingai ïa ki jaka ki Raid da kaba pynmih ïa ka jingpynbna, ba kane ka jingpynbna kan treikam mardor, hynrei kan ym treikam ïa ki jaka ba la thied da ka Sorkar Pdeng bad Sorkar Jylla.
Ka mang tyngka ka tyrwa ban thung ïa u Land Recording Officer uba shemphang ha ka GIS ban pyntreikam ïa ka DILRMP bad ka KHAD (Regulation and Administration of Land) Act, 2021, hapdeng ka jingnang kiew ki nongaplai ïa ka Title Rights Certificate.
Halor ka jingpynmih pisa, u Bah Seiborlang u la ong ba ka Executive Committee ka la pyllait ïa ka Bilingual Pamphlet hapoh ka “Meghalaya Professions, Trades, Callings and Employment Taxation Act, 1947” ban pynsngewthuh ïa ki nongsiew khajna, khamtam ha ki Unorganised Sector.
Halor ka song pisa na ka Sorkar Pdeng, u la pynpaw ba ka 16th Finance Commission ka la mang T.1,479 klur ïa ka Meghalaya Rural Local Bodies naduh u snem 2025-26 haduh 2030-31, bad ka bhah ka KHADC jong u snem 2026-27 ka long T.85.50 klur ka ban phiah sha ka Basic bad Performance Grant ba 80:20.
U bynrap ba ka Council ka dang ap ban ïoh sa T.12.15 klur hapoh ka Installment kaba ar jong ka 15th Finance Commission Untied Grant 2022-23.
U Bah Seiborlang u la pyntip ruh ba ka Council ka la ïasoi ïa ka MoU bad ka IORA Ecological Solution Pvt na ka bynta ki kam thungdieng ne ban pynrben biang ïa ki khlaw bad ki Carbon projek.
