Shillong, Jylliew 17
U Myntri ka Sorkar Jylla ba khmih ïa ka tnad Arts and Culture Bah Sanbor Shullai ha ka sngi Balang u la hiar jurip ïa ka jaka ba don mar pyrshah bad ka Kiang Nangbah Government College, Jowai ban peit bad khmih na ka bynta ban pynïeng ïa u motdur ba shi rynïeng jong u Woh Kiang Nangbah, uba dei u nongïakhun laitluid bad khlawait ka ri Pnar.
Ha kane ka sngi ïa u Bah Sanbor la synran lang da u Bah Wailadmiki Shylla uba dei u MLA ka thaiñ bad ruh u Myntri Sorkar ryngkat ki ophisar bad engineer na ki tnad Sorkar lem bad ka JSU bad ka seng ki samla pule ka Kiang Nangbah College.
Hadien ba la dep ban jurip ïa ka jaka bad ban ai nam ruh kum ka Kiang Nangbah Square, u Bah Sanbor haba kren sha ki lad pathai khubor u la pyntip ba kane ka dei ka sien kaba ar ba u la hiar jurip ïa katei ka jaka, kata ha u snem 2022 por ba u long Myntri ha ka Sorkar MDA-I, ha kaba ma u ryngkat u MLA ka thaiñ Bah Wailadmiki lem ki nongïalam shnong bad ki seng ki la ai ruh da ka jingthoh sha ka tnad Transport na ka bynta ban ai ïa ka jaka, kaba ki la pan 10 hajar sq ft na ka bynta ban pynïeng ïa u mot sahnam ba shi rynïeng jong u Kiang Nangbah, hynrei namar ka jingwan noh jong ka ilekshon ha u snem ba bud, bad ba u khlem long Myntri shuh ha kaba sdang ïa ka Sorkar MDA-II, kumta kane ka kam kala sahkut noh.
Haba kylli, u Bah Sanbor u la ong, ka jingpan jaka 10 hajar sq ft, ka long ba nalor u mot shi rynïeng jong u Kiang Nangbah, yn shna ruh ïa ka park, ki jaka shongkai, ki jaka ban buh ïa ki history jong ki riewkhraw ka Rilum Jaiñtia bad kiwei kiwei, ym tang ba kan khring ïa ki nongshong shnong hynrei wat ïa kiwei ruh kumjuh.
Haba kylli halor ka jingshimkhia ban pynïeng ïa ki mot sahnam jong ki khlawait ka Jylla, u Bah Sanbor u la jubab da kaba ai nuksa, “Ngi sakhi ba hapoh State Central Library Shillong ngi don ïa u motdur ba shi rynïeng jong ka Indira Gandhi bad u Subhash Chandra Bose hynrei jong u Tirot Sing, Kiang Nangbah bad Pa Togan u don tang uwei u maw kyrteng ïa ki bad wat u motdur jong u Babu Soso Tham ruh u don uba tang shiteng. Ha ka por jong nga, ngi la pynïeng ïa u motdur ba shi rynïeng jong u Tirot Sing, Kiang Nangbah bad Pa Togan bad kane ka jingpynïeng ka dei ruh namar ka jingai jingmut jong kiba bun ki samla samhoi.”
U Bah Sanbor u la ong, “Kum ki nongmihkhmat paidbah ryngkat bad kane ka Sorkar, ngi ïaid beit ha ka nongrim ban trei beit da ka kam bad ban pynduna ïa ka jingkren ne kata kaba ki ong ha ka ktien nongwei ‘Work More, Talk Less’. Kumta ngi sngew tynnad ban pynsawa jam da ka kam ne ban kren jam da ki kam bad pynduna ka pynsawa da ka ktien bad ngim don por ban leit hylla sha ïew ne surok.”
U Bah Sanbor u la ong, kane ka jingjurip kan dei ruh kaba khatduh namar la ïa rai ba nangne shakhmat yn ïeng beit ha kajuh ka nongrim ban pan ïa ka jaka kaba 10,000 sq ft na ka tnad Transport bad nangne yn sdang ban phah noh ïa ki kot ki sla ban ïoh pynïeng ïa u motdur ba shi rynïeng u Kiang Nangbah.
“Nga ngeit skhem ba da ka jingïatreilang jong u MLA ka thaiñ Bah Wailadmiki Shylla, ka jingshimkhia u Myntri Rangbah u Conrad Sangma bad u Symbud Myntri Rangbah Bah Sniawbhalang Dhar, kiba la pynpaw ba dei beit ban ïaid shakhmat bad ban aiti ïa ka kaiphod khnang ba yn ïoh ban bhah noh ïa ka pisa bad hapoh jong une u snem yn sa sdang noh ïa ka jingtei ïa u motdur jong u Kiang Nangbah,” la ong u Bah Sanbor.
U Bah Wailadmiki Shylla pat ha ka jingkren u la pynpaw ka jingsngewnguh ïa u Bah Sanbor uba la shimkhia ïa kane ka kam naduh ki snem kiba la leit bad kumjuh ruh ïa ki nongïalam shnong, ka JSU bad kiwei kiwei kiba pyni ïa ka jingkwah ka jong ki ban ïoh ïa ka jaka ban pynsah kynmaw ïa u khlawait na Rilum Jaiñtia u Woh Kiang Nangbah.
U la ong, ka jingjied ïa kane ka jaka ka dei namar ba ka don mar pyrshah ïa ka Kiang Nangbah Government College kaba dei ka jaka pule kaba la rim bad ïa kane ka jaka ban buh ïa u motdur ha Mihmyntdu yn sa ai kyrteng da ka Kiang Nangbah Square.
