Imphal, Rymphang 28 (UNI)
Ka sorkar Manipur ka la bat haduh 1,87,143 ngut ki briew hapoh ki kyndon jong ka aiñ bad la pyllait noh ïa ki naduh ba la sdang ka jingïakynad ha Manipur ha u bnai Jymmang 2023 ha kaba palat 200 ngut ki briew ki la duh noh la ka jingim, la ong ka Lat ka jylla Manipur, ka Dr. Anusuiya Uikey ha ka Sngi Balang.
Haba plie ïa ka Dorbar Mang Tyngka jong ka Ïingdorbar Thawaiñ, ka Uikey ka la ïathuh ba la dep ban ujor kumba 10,000 tylli ki FIR haduh mynta. Na kine, 29 tylli la aiti sha ka CBI bad kawei sha ka NIA ba kin tohkit.
Ban teh lakam ïa ka jingïakynad, ka la ong ba nalor ki pulit ka jylla, ki don ruh sa 198 tylli ki kompani ki pulit ka Sorkar Pdeng (Central Armed Police Force), bad 140 tylli ki Column ki shipai ka Ri.
Shuh shuh ka Lat ka la ïathuh ba la buh da ka komiti ka ban peit bniah halor ka jingshah knieh jong ki tiar siat na ki pulit. Ka la ong ba ki tnat syntiat ki dang don ha ka kam ban ïoh kurup biang ïa kine ki tiar siat baroh.
“Ka long kaba sngewsih ba 219 ngut ki briew ki la duh noh la ka jingim ha ka jingïakynad. La sam ïa ka pisa kaba T. 10 lak sha ki bahaïing hasem jong kiba la khlad, T. 1,000 ha ka ar sien sam sha baroh ki briew kiba la kylla phet wir, bad yn sa sam biang ha ka sien kaba lai ïa kane ka pisa,” la ong ka Lat.
Shuh shuh ka la ïathuh ba ka sorkar ka la pynlut kumba T. 200 klur ha ki liang bapher-bapher ban ïarap ïa ki briew kiba la shah ktah. Ban siew ïa ka bai lutksan sha ki nongrep namar ka jingduh, ka sorkar ka la ai ` 38.60 klur, ka la bynrap.
Na ka bynta ki khynnah pule kiba sah ha ki ïing dara, la pynïasoh ïa ki bad ki skul kiba marjan khlem da donkam ban pynlut tam. La ai ruh ka lad ban pynïasoh sha kano-kano ka kolej kaba ki kwah, jingpynrung klas ei, bad ka pisa kaba T. 10,000 nalor ka jingsam ei ïa ki ‘Smartphone’.
La ïathuh ruh ba ha u snem 2023-24, ka jylla ka la duhnong haduh `800 klur.
