Nongstoiñ, Rymphang 28
U Deputy Commissioner, West Khasi Hills, Bah Garod SN Dykes u la pynmih ïa ka hukum hapoh ka kyndon 144 CrPC ban maham tyngeh bad khang pyrshah ban thang pathar ïa ki khlaw ki btap ne ki jaka rep jaka riang.
Kane ka jingpynmih hukum ka la long hadien katto-katne sngi ba ki la don ki kynhun kiba mih shakhmat ban ujor sha u Deputy Commissioner ka West Khasi Hills halor ka jingkynrei jong ka jingwiang ding ïa ki lum, ki khlaw ki btap ha ki bynta jong ka West Khasi Hills kaba la ktah shisha ïa kiba bun ki nongrep ban thung dieng.
Ha ka kyrwoh khubor la pynpaw ba ka jingmlien kaba sniew ban thang bad wiang ding ïa ki lum bad ki khlaw ki btap, ka ktah ïa ka mariang, ki sawdong sawkun, ki mrad ki mreng, ki jingthaw kiba im bad ha kajuh ka por ka pynjakhlia ruh ïa ka lyer, ka buh jingma ïa ka jingim jong ki briew, ki mar ki mata, ki jingri jingdup bad la lap ruh ba ki briew ki mlien bha ban wiang ding ïa ki lum bad ki khlaw ki btap kiba don hapoh West Khasi Hills District kum ka Mawlangkhar, Mawpun, Nongkhnum bad kiwei pat ki jaka.
Namarkata, khnang ban tehlakam ïa kane ka jingmlien bad ban ïada ïa ka mariang, u District Magistrate ka West Khasi Hills hapoh ka kyndon 144 CrPC u la pynmih ïa ka hukum ban mana bad khang pyrshah ïa ka jingwiang ding ïa ki lum bad thang ïa ki khlaw ki btap, ki jaka rep ki jaka riang, ki park bad kiwei kiwei de ki jaka kiba don hapoh West Khasi Hills District.
Shuh shuh ka kyrwoh khubor na u District Magistrate ka ong ruh ba kane ka hukum kan treikam beit kumne-kumne tad ynda la pynbna da kumwei pat.
Ym tang katta, la pynpaw ruh ba lada lap ïa kino- kino kiba ïaleh pyrshah ïa kane ka hukum kin shah pynshitom katkum ki kyndon jong ka aiñ.
