Shillong, Rymphang 28
U Myntri ba khmih ïa ka tnat Pule-Puthi ka jylla u Rakkam A Sangma, u la ong ba ka jingkiew dor jong ki kot skul kam dei satia ban mih namar ba ïa ki dor la dep ban shon lypa ha ka kot.
Haba kren sha ki lad pathai khubor ha ka Sngi Balang, u Myntri u la ong ba kumba ka long ka dor jong ki kot pule ka dei ban long beit thik katkum ka dor kaba la shon ha ka kot.
U la ong ba ka jingkiew dor ki kot pule kam dei ban mih bad halor kane um shym la ïoh jingtip kaba thikna, hynrei u la ong ba ka kot kam dei ban kiew na kaba la buh dor hynrei lada don kiba shim tam ïa ka dor dei ban ai da ka jingujor sha ki pulit.
Ha kawei pat ka liang, u Myntri u la ong ruh ba ka lah ban don ka jingduna hangne-hangtai namar ba ka sorkar ka dang wanrah da ki kot thymmai khamtam ka kot Science, English bad Mathematics.
Haba kylli halor ka jingshon duna ïa ki kot skul, u Myntri u la ong ba kan nym lah ban long namar na ka liang jong ka Meghalaya Board of School Education (MBOSE) ka la dep ban ai jingthoh halor ka jingdonkam ïa ki kot sha ki nongpynmih kot bad kum u Myntri ruh u la dep ïoh jingtip ba katno tylli ki kot la donkam ban shon.
Lah ban kdew ba na ka liang jong ki kmie ki kpa ki la ud ïa ka jinghiran ki kot pule bad ka jingoh dor tam ïa ka dor jong ki kot, kaba la pynkhuslai khamtam ïa kiba duna ha ka ïoh ka kot. Nalor kane, la shem ruh ba ka KSU ruh dang ha kine ki sngi ka la leit ban khynra ïa ki dukan die kot bad pynpaw ba ka don ka jingleh tam na ka liang ki nongdie da kaba shim dor tam na ka dor kaba la buh lypa.
