Shillong, Rymphang 28
U nongaiktien bad National Media Coordina tor ka Congress jong ka Thaiñ Shatei Lam Mihngi, u Mathew Antony ha ka Sngi Balang u la ong ba ka jingphet jong kiba bun ki nongïalam ka Congress sha ka BJP ka dei namarba ka seng (BJP) ka duna palat ïa ki nongialam kiba tbit.
“Ka jingmih jong ki nongïalam na ka Congress ka dei namarba ka BJP ka la kylla long ka ‘alumni party’ jong ki nongïalam Congress,” la ong u Antony haba kren sha ki lad pathai khubor.
Ha kajuh ka por, u la ong ba kane ka kdew shai ba ka BJP kam don ïa ka sap ka phong.
Haba pynsngew ba ki don da ki hajar ngut ki nongtrei ka BJP ha kylleng ki Jylla kiba la lah ban pynlong ïa ka seng kumba ka long mynta, utei u nongaiktien u la buh jingkylli, “Hato phi sngew ba baroh ki sngewkmen halor ka jingïoh nongmihkhmat hapoh Rajya Sabha bad ki kam Myntri Rangbah nalor kiwei-kiwei ki kam ba kin leit sha ki nongïalam barim ka Congress?”
“Balei ki nongïalam ka Congress ki phet noh na ka seng…lada ki kynhun tohkit ka Sorkar Pdeng ki wan tied ha jingkhang jong phi ha ryngkat ki mukotduma ba lamler hapoh ka Enforcement Directorate, CBI…kata phi shah pynbor, ne ki bahaïing jong phi ki shah byrngem ban shah set along, kaei pat ka lad kaba ki don,” u la ong.
U la ong ruh, “Kane ka Sorkar BJP khlem jinglehraiñ ka la pyni ïa kane…ha kaba ka ïingbishar ba hakhlieh duh ka ri ka la ai ruh ka rai halor kane, ba ki leh ïa kiba bun ki kam ki bym ïahap bad ka Riti Synshar.”
Shuh shuh haba pynsngew ba kiba bun ki mukotduma ki lah ban ym don ïa ki sabut, u Antony u la ai nuksa ïa ka mat halor ka ‘Electoral Bond’, ha kaba ki jingthoh ha ki lad pathai khubor ki ïathuh ba bun na ki nongsynñiang ki la shah khynra hashuwa jong ka jingsynñiang bad la pynbor pat ïa ki ban synñiang.
“Kumta u suri hapoh jong ka BJP u la mih shabar bad kumta ka BJP ka la jan dei ka ‘alumni party’ jong ki nongïalam ka Congress. Kiba bun na ki Myntri Rangbah ki dei na ka Congress, kiba bun na ki Myntri Sorkar Pdeng ki dei na ka Congress bad ka dei ka seng kaba duna ki nongïalam,” u la ong.
