New Delhi, Rymphang 29
Ha ka jingïatreilang hapdeng ki shipai duriaw (Indian Navy) bad ka Narcotics Control Bureau (NCB), la ïoh ban kurup haduh 3,300 kilo u drok na kawei ka jhad najan Porbandar, Gujarat, bad kane ka long kawei na ki jingïoh kurup kaba heh tam.
Ha ka Sngi Ba-Ar, ki shipai duriaw ki la ïoh bat ïa kawei ka jhad kaba rit bad na kane ka jhad, la kurup haduh 3,089 kilo u Charas, 158 kilo u Methamphetamine bad 25 kilo ka Morphine. La antad ba kine baroh ki shongdor haduh T.1,300 klur.
Na katei ka jhad, la ïoh ruh ban kem ïa san ngut ki briew kiba dei ki nongshong shnong ka Pakistan.
Ha u kyrwoh khubor, ki shipai duriaw ki la ong ba ki la ïoh ïa ki khubor syntiat lyngba ka liengsuiñ syntiat jong ki bad ïa kiba la pynthikna da ka NCB halor ka jingdon jong ka jhad kaba kit ïa ki drok. Hadien kata, la phah ïa ki shipai ha ka jhad ïapom ban leit pynsangeh ïa katei ka jhad ynda ka la rung sha u pud u sam jong ka India. Na ka liang ki shipai, ki la ïoh ban pynsangeh ïa katei ka jhad.
Na katei ka jhad, hadien ba la pynlong ïa ka jingkhynra, la lap ïa kitei ki drok ba la kdew haneng. Ïa katei ka jhad la tan noh da ka jhad ïapom bad ïa ki drok bad ki briew kiba don ha ka jhad la aiti noh sha ki pulit ba kin leh ïa kaba donkam.
Ki shipai duriaw ki la ong ba katei ka jingïoh kurup drok ka long ka bakongsan bha ym tang na ka jingbun jong u drok bad ka jingshongdor ka barem jong u, hynrei ka pyni ruh ïa ka jingïatreilang hapdeng ki Navy bad ka NCB ban pyndkut ïa ka jingkhaïi drok kaba mih na ka Makran Coast.
Ki shipai ki la ong ruh ba ka jingjop jong katei ka jingïatreilang ka pynskhem ïa ka jingïakhun pyrshah drok da ki shipai duriaw ban khanglad ïa ki ‘riewbymman ban pyndonkam ïa ki duriaw kum ki lad ban khaïi drok.
