Shillong, Rymphang 28
Ka jingshah tuh ki ar shaka bad ki thuk-thuk ha kylleng ka jylla kam don jingkut lada peit na ki jingujor ba la ai sha ki pulit.
Ha kawei ka jingjia, u Prakash Basumatary u la ujor ba ha ka miet jong ka 26-27 Rymphang, ki runar ki la tuh ïa ka thuk-thuk (ML-05AB-0106) jong u na ka ïing sah jong u kaba don ha Mawblei, Madanrting, Shillong.
Nangta, u Baptu Deb u la ujor ba ha ka miet jong ka 26 tarik Rymphang, ki runar ki la rong ei ïa ka thuk-thuk jong u (ML-05V-3865) na Lower Mawprem, Shillong.
Sa ha kawei pat ka jingjia, u Md. Sarbat Khan u la ujor da ka ktien ha thanat Byrnihat ba ki runar ki la tuh 11 song ki sikret bad ka pisa kaba T.5,000 na ka dukan jong u kaba don ha 15 Mer, Byrnihat.
Shuh shuh ki pulit ki la ïathuh ba u Nikseng D Sangma u la ujor ba ha ka 24 tarik Rymphang ha ka por kumba 10:55 mynmiet, u Nokma ka Bollonggre A’king Land u la pyntip ba ki runar ki la tuh hapdeng 10-15 tylli ki tin sop ïing ba shongdor T.7,000 na ka jaka ban tei ïa ka AD Camp ha Bitching Bazar, Bollonggre ha West Garo Hills.
