Mawkyrwat, Rymphang 28
U Bah Robertjune Kharjahrin, uba dei u kyrtong MP ka UDP na Shillong Parliamentary ha ka jingïalang paidbah kaba la long ha ka Sngi Balang ha Ïew Umdohlun, South West Khasi Hills District u la ther tyngeh ïa ki seng rithor da kaba kynthoh ba ki dei ki seng kiba wan pynbiej ïa ki paidbah tang ha ka por ilekshon.
U Bah Robertjune u la ong ruh ba la 35 tylli ki snem ki paidbah ki la jied bad ailad ïa kita ki seng rithor hynrei kaba sngewsih ka long ba haduh mynta tang ïa u pud u sam kim lah ban pynbeit.
“Ngi la dawa ïa ka ILP, ngi la dawa ban pynrung noh ïa ka ktien Khasi ha ka Khyrnit kaba Phra, ngi la dawa ïa ka roi ka par bad kumjuh ruh ngi la dawa ban ai noh la ka jong ka Cadet, hynrei haduh mynta ngim shym la ïoh,” u la ong.
“Wat hapdeng kita ki jingeh ki jingjynjar hynrei dang don pat kiba wan pynbiej kiba ong jied noh ïa ka seng jong ngi, ngin wanrah ïa ka dud bad ka ngap. Ngim donkam dud ne ka ngap ngi donkam ïa ka aiñ ban ïada ïa ka Ri bad ka Jaidbynriew,” la ong u Bah Robertjune.
U la ong ruh ba U Blei uba la kyrkhu ïa ka Ri Khasi u la ai ïa ka dud bad ka ngap bad kumta dei ban trei shitom ban synshar hi dalade ïalade.
U la pynkynmaw ruh ïa u nongthoh poitri ba pawnam u bym shym dei na ka jaidbynriew Khasi hynrei uba la thoh ïa ka poitri kaba ai mynsiem ïa ka jaidbynriew kaba ong ‘Ïeng Ko Khun Khasi Synshar Hi Maphi Ïa La Ka Ri’. Hynrei dang don pat napdeng ki khun Khasi kiba dang artatien ban synshar dalade ïalade bad ki dang pyrkhat ba ka khambha ban aiwai ïa ka synshar ka khadar sha ki seng rithor hana ba kin long kum ki panah ban pynap ïing, la ong u Bah Robertjune.
Na ka liang une u kyrtong MP ka UDP, u la wer bad khot ïa ki paidbah ba kin ai ka jingkyrshan ïa u ha kane ka kynti ba mynta bad u da kyntu ruh ïa ki paidbah ba ki dei ban da pynshong nongrim bha haba ki jied ïa ki nongmihkhmat ym ban rai shongshit ne pynkyndeh da ki sur tem hynrei ban rai da ka jingkitkhlieh khnang ban nym bakla ban phah da u briew uba paka u ban leit ïasaid hapoh dorbar bah Parliament.Ha kane ka sngi la ïadonlang ruh u Bah Pius Marweiñ, Chairman RDA, SWKHD, Bah Jeslanroy Nongsiej, Secretary RDA, SWKHD, Kong Badarity Nonglait, Bah Tirot Sing Suchiang bad kiwei kiwei ki nongïalam ka RDA.
