Shillong, Rymphang 28
Ki pulit ‘Commando’ ka Manipur ha ki bynta bapher bapher jong ka jylla ha ka Sngi Balang ki la pyndem noh ïa ki tiar siat jong ki kum ka dak ban pyni ïa ka jingpynrem halor ka jingshah thombor bad jingshah rahbor jong uwei u heh pulit ha ka Sngi Ba-Ar.
Ha ka miet jong ka Sngi Ba-Ar, kumba 200 ngut ki ‘riew kieng atiar ba la ngeit ba ki dei na ka kynhun Metei ba la ai kyrteng “Arambai Tenggol”, ki la thombor ïa ka ïing sah jong u Additional Superintendent of Police (ASP), u Moirangthem Amit, kaba don ha Imphal East, bad ki la rahbor ïa u lem bad uwei u nongbud pahara jong u.
U Moirangthem Amit u dei u Additional SP jong ka Imphal West. Hynrei ha katei kajuh hi ka miet, ki bor pahara ki la ïoh ban pyllait ïa u Amit bad u nongbud jong u na ka jaka ba la tip kum ka Kwakeithel Konjeng Leikai bad la rah ïa ki sha Raj Medicity ban ïoh jingsumar.
Ki khubor ba la pynmih ha kane ka sngi ki la ïathuh ba nalor ka jingpynrem ïa ka jingshah thombor bad jingshah rahbor jong utei u heh pulit, kitei ki pulit ‘Commando’ ki la pynpaw ïa ka jingsngewdiaw halor ka jingkynnoh ba kitei ki ‘riew kieng atiar ki la ïoh jingkyrshan na ki ‘riew paidbah ha ka miet jong ka Sngi Ba-Ar.
La ong ba katei ka jingpyndem ïa ki tiar siat la leh da ki pulit ‘Commando’ kiba don ha ki distrik kum ka Imphal East, Imphal West bad Bishnupur.
Ka jingshah thombor jong u Moirangthem Amit ka la wan hadien ba katto-katne ngut ki dkhot jong ka kynhun “Arambai Tenggol” ki la shah kem ha ki pulit ha kaba ïadei bad ka jingshah tuh jong artylli ki kali.
Nalorkata, hashwa ka jingshah thombor jong u Additional SP, ka la don ruh ka jingthombor ïa ka shlem treikam jong u SP ka Churachandpur kumba katto-katne sngi mynshwa. Ka la don ruh ka jingthang ïa ka shlem treikam bad ka ïing sah u DC ka Churachandpur hadien ba uwei u pulit uba dei u Kuki u la shah sospon na ka kam.
Lah ban kdew ba lai ngut ki briew, ba kynthup ïa kawei ka ‘riew kynthei, ki la mynsaw, ha ka jingïasiat hapdeng kitei ki ‘riewkieng atiar bad ki pulit hajan ka ïing sah jong u Additional SP.
