Shillong, Rymphang 28
Ka jingjia ba pluh ka shlem treikam ki muktiar kaba tip kum ka Shillong Bar Association yn tohkit da u majistor bad ka por ban pyndep ïa ka jingtohkit ka long 10 sngi.
Ïa kane ka jingtohkit majistor yn khlieh da u Additional District Magistrate u Bah R Wahlang ban tohkit bniah halor ka jingpluh kaba la pynjulor ïa katei ka ïing kaba la don mynta la palat 110 snem naduh u snem 1913.
Kumta haba ïadei bad ka jingpluh katei ka shlem treikam ki nongsaid aiñ kaba dei kawei na ki ïing rim ba shna naduh hyndai, ka shlem treikam u District Magistrate ka East Khasi Hills ka la pynmih ïa ka jingpyntip sha baroh ki briew kiba don jingtip shaphang ka jingjia ba kin phah ki jingbatai haba ïadei bad ka jingpluh kaba la jia ha ka miet 24 tarik Rymphang, 2024 bad ki dei ban phah sha u Additional District Magistrate ha shlem treikam u Deputy Commissioner, East Khasi Hills District, Shillong (kamra No. 324) ha lane shwa ka 29 tarik Rymphang 2024.
Ki la don katto-katne ki jingjia pluh ïing kiba shyrkhei ha kine ki khyndiat bnai kynthup ka jingpluh ka ïing kaba bun mala jong u hehspah ha Khyndai Lad ha ka 14 tarik u Risaw 2023.
Haba ïadei bad kane ka jingpluh ruh la thung da ka jingtohkit majistor hynrei na ka liang ka bor district ka East Khasi Hills district ym pat tip aïu la leh haba ïadei bad kane jingpluh jong kane ka ïing bun mala khamtam namar ka dei kaba la shah pynjulor bha ha ka ding bad kam long ka jingshngaiñ.
Kumta ym pat tip haduh mynta aïu ka bor district kan leh, la kan pynkhyllem noh ïa kane ka ïing bun mala ne yn dang ailad ban shu maramot biang namar ki ïing kiba don marjan bad kane ka ïing bun mala kaba la julor, kim don ka jingshngaiñ.
