Shillong, Rymphanng:
Ka jingpynkhreh ïa ka ilekshon Member of Parliament (MP) sha ka ïingdorbar jong ka Lok Sabha ka la nang ïaid shakhmat ha kaba la ïohi ba ki seng saiñ pyrthei ki la sei bad pynbna ïa ki kyrteng jong ki kyrtong ki ban aireng ha kane ka ilekshon ka ban sa long shen.
Na ka liang u Bah Sanbor Shullai uba dei nongmihkhmat ka BJP napoh ka 19-South Shillong Constituency ha ryngkat bad ki nongkitkam katei ka konstitwensi ki la leit ban ïakynduh ïa u State President ka BJP, u Rikman Momin ha ka Sngi Ba-ar kum shibynta ban pynpaw ïa ka jingai jingmut bad ka jingtyrwa ban ai tiket MP ïa ka Dr. Fenela Lyngdoh Nonglait ba kan ïakhun ïa ka shuki MP ka Lok Sabha napoh ka Shillong Parliamentary Constituency.
“Ngi wan mynta ka sngi ban ïakynduh bad ban ai da ka jingthoh ïa u State President jong ngi, u Rikman Momin ba ngin pynpaw ïa kane ka jingkwah jong ngi lyngba jong u sha ka seng ban ai tiket ïa ka Dr. Fenela Lyngdoh Nonglait”, la ong u Bah Sanbor.
Haba kren sha ki lad pathai khubor mynta ka sngi ha shlem treikam ka BJP hadien ka jingïakynduh ïa u Rikman Momin, u Bah Sanbor Shullai u la ong ba ka jingkwah jong u bad ki nongkitkam ka konstitwensi ka long ban pynïeng kyrtong da ka Dr. Fenela namar ba ka dei kaba la pynïasoh bad ka seng naduh ki snem kiba lah dep kata naduh ka por ba u Bah Ernest Mawrie u dang long kum u State President ka seng.
U Bah Sanbor u la ïathuh ba u Bah Ernest Mawrie u la thep kyrteng ban ïakhun ïa ka MP na ka seng bad kumjuh ruh ka Dr Fenela ka la thep kyrteng hynrei na ka liang u Bah AL Hek ruh la shu ïohi tang ha ki lad pathai khubor ba u la ong ba u don ïa ka jingmut ban ïakhun ïa ka ilekshon MP hynrei pat u khlem shym la thep kyrteng satia.
Shuh shuh u Bah Sanbor u la ïathuh ba ha ka jingïakren bad u Bah Ernest Mawrie, u Bah Mawrie u la ong ba u lah dep ban ïakren bad ki katto-katne ngut ki President barim ka seng bad u la thep kyrteng ïalade ban pan tiket ban ïakhun ïa ka ilekshon MP.
U Bah Sanbor u la ong na ka liang jong u un sa leit ban ïakynduh ïa u Bah Hek ban ïakren halor ka jingdonkam ban ïatylli lang kawei khnang ban ai jingkyrshan bad ban pynïoh tiket ïa ka Dr. Fenela Lyngdoh Nonglait namar ka la leit ban ïalap ilekshon kylleng-kylleng la jan kumba shisnem eiei.
U Bah Sanbor u la ong ba kum ka seng ka long kaba donbok bha ban ïoh da ka kyrtong kum ka Dr. Fenela namar ka dei ka briew kaba tbit bad kaba shemphang ha baroh ki liang ha kaba ki paidbah ha baroh kawei ka Ri Khasi-Jaiñtia bad Garo ki ithuh ïa ka Dr. Fenela bad ka long ruh ka jingmyntoi kaba khraw bha ba ki nongïalam ba dang samla kum ka Dr. Fenela kaba dei ka kynthei ka wan ban pynïasoh sha ka seng.
“Ka long ka kyrtong kaba ngin donbok ban ïoh kum ka Dr. Fenela namar ka dei kaba la shemphang ha ka jingïaid lynti hapoh ka imlang-sahlang bad ha ka saiñ hima-sima, ka la long ruh ka plidar kaba pawnam bad kum ka nonghikai hapoh ka Law College ha kaba la ïoh ruh ïa ka Gold Medal hapoh ka Law na Delhi bad ka dei kaba ïadonbynta ha ki kam bapher-bapher”, la ong u Bah Sanbor.
