Shillong, Rymphang:
U Myntri Rangbah u Conrad K Sangma u la ong ba un sa phah shithi sha baroh ki MLA kiba wanrah ïa ki mat bapher bapher haba ki ïashimbynta ha ka jingïakren halor ka mang tyngka jong u snem 2024-2025.
U la ïathuh ba u la bthah ïa ka kynhun jong ka tnat pla tyngka ban thoh ïa baroh ki mat kiba la pynsngew da ki MLA kiba ïashimbynta ha ka jingïatai halor ka mang tyngka bad un sa phah ka jubab sha baroh ki MLA kiba la ïashimbynta ha ka jingïakren ha Ïingdorbar.
U la ong ba yn nym lah ban phah noh ïa ka jubab mar-mar hynrei un shimpor kumba 10 haduh 15 sngi ban leh ïa kata.
U la ong ba ka long kaei kaei ka bym dei lada um phah ïa ka jubab halor ki mat kiba la pynsngew da ki MLA, bad u sngew dei ba u dei ban phah sha baroh ki MLA kiba la ïashimbynta.
