Shillong, Rymphang 28
Wat la ka sorkar Assam ka la wanrah da ka aiñ kaba la tip kum ka Assam Healing (Prevention of Evil Practices) Bill, 2024 ban nym shah ban pynkhiah ha ka kyrteng ka jingngeit ne ban pynkylla niam ïa kiwei pat, hynrei ka jingïaseng jong ka Karbi Anglong Presbyterian Synod kaba ju long man u snem kan ïaid beit shakhmat mynta u snem (2024).
Ka jingïaseng Karbi Anglong Presbyterian Synod kan sdang naduh ka 4 tarik haduh 7 tarik Ïaïong ha Balang Presbyterian Puralangso, kaba hap ha Dima Hasao District, Assam, kaba jngai tang 14 km na khappud Meghalaya.
Haba ïoh ban ïakren bad u Tymmenbasan N. War uba dei u Khasi uba long dkhot ha Karbi Anglong Presbyterian Synod, u la ïathuh ba ki Khasi kiba don ha kane ka Synod ki don hapoh 10,000 ngut.
U la ïathuh ba katei ka aiñ kaba la mynjur da ka sorkar Assam kan nym treikam haba pynlong ïa ka jingïaseng jong ka Karbi Anglong Presbyterian Synod kaba phra ha katei ka Balang Puralangso.
Shuh shuh u la ïathuh ba ki Khasi kiba sah ha Karbi Anglong ki hap ban rwai bad kren da ka ktien Karbi namar ki kham bun ki Karbi ha katei ka Synod, katba ha kiwei ki Synod kiba dei ha jylla Assam haba ki Khasi ki khambun ki ïoh ban rwai bad pynïaid da ka ktien Khasi.
Haba kylli ka don ne em ka jingktah ïa ka Balang Khristan ha Assam haba la wanrah ïa katei ka aiñ da ka sorkar Assam, u la ong ba kan nym ktah namar la khang tang ban pynlong ka Jingïaseng Pynkhiah (healing) ne ban ïalap ban pynkylla niam ïa kiwei hynrei ka jingïaseng kaba ju long tang para Khristan kan ïaid beit.
Kumban shu pynkynmaw u Himanta Biswa Sarma u Myntri Rangbah ka jylla u la ong ba ka jingwanrah ia kane ka ain ka long ban nym shah ban pynkylla niam na kawei ka niam sha kawei pat hynrei ki hindu ai kin long ki hindu, ki khristan kin long beit ki khristan bad ki muslin kin long beit ki muslim.
