Nongstoiñ, Rymphang:
Ki nongïalam shnong jong ka Umwali kaba hap ha ka thaiñ Langpih, ha ka Sngi Ba-ar ki la leit ban ïakynduh ïa u Superintendent of Police ka West Khasi Hills, u Bikram Marak, ban aiti ïa ki kot ki sla jong ka khyndew kaba ai sngewbha da ka shnong na ka bynta ban tei ïa ka Police Out-Post ha ka shnong Umwali.
Kane ka jingai jaka sngewbha da ka shnong ka long halor ka jingangnud ban ïoh noh ïa ka shongsuk shongsaiñ hapoh ka shnong ka thaw bad ban lait na ka jingwan thombor ki briew kiba nabar khamtam na Assam naba ka shnong Umwali ka dei kawei na ki jaka kaba don mynta hapdeng ka jingïapynbeit pud jong ar sorkar.
U Bah Teiborlin Nonglang uba dei u Sordar ka shnong Umwali haba kren ha u nongthoh khubor u la ïathuh ba katei ka jaka ïa kaba ka shnong ka ai sngewbha sha ka sorkar lyngba ka tnat pulit ka don kumba shi akar shiteng (1.50 acre) ba ka dei ruh kaba don hapoh jong ka shnong Umwali.
U la ong ruh ba ka daw ba ka shnong ka ai sngewbha ïa katei ka khyndew sha ka tnat pulit ka long ruh hadien ba ka shnong ka la ïohi ba ka sorkar ka don ïa ka jingthmu ban shna biang ïa ki ‘out post’ ha kylleng ki jaka jong ka Jylla bad kawei na kine ka dei hapoh ka shnong Umwali.
“Ka shnong ka pynpaw ïa ka jingsngewkmen ha kaba ngi ai ïa katei ka jaka, bad ngi kyrmen ba lyngba ka jingwan jong ka ‘out post’ lehse kan lait noh na ka jingïai shah thombor ha ki briew kiba nabar khamtam ha ki briew jong ka Assam kaba ju jia na ka por sha ka por,” la ong u Bah Teiborlin.
U Bah Teiborlin u la ong ba ka shnong hi ka don ïa ka jingkyrmen ba ïa katei ka ktem pulit shen ka sorkar lyngba ka tnat kan pynurlong noh.
U la ong ruh ba naduh ka por ba ka sorkar ka la pynbna ban thaw thymmai ïa ki ‘out post’ ha kylleng ki jaka ka Jylla bad kawei na ki ‘out post’ ïa kaba yn shna thymmai kan dei ha Umwali. Kumta na ka liang ka shnong hi ka la sngew ïoh mynsiem bad ka shnong ka pynpaw ba ki sngew ban pdiang ïa kata ha kaba ka kyrmen ba lyngba ka jingwan jong ka out post kan ïoh ïa ka shongsuk shongsaiñ.
U la ong ba ha ka jingleit ïakynduh ïa u SP, na ka liang ka shnong ka pynpaw ïa ka jingsnge tynnad bad ka la don ruh ka jingïakren ïa bun kiei-kiei ha kaba ïadei bad ka shongsuk shongsaiñ hapoh ka shnong bad ka thaiñ kumjuh. Nalor kata, u la ong ruh ba ka shnong ka pynpaw sha ka sorkar ba lada ki sngewsynei ïa ki paid nongshong shnong ha ki thaiñ khappud la kumno-kumno kam dei ban pynslem ïa ka jingtei ïa ka out post ha Umwali.
U Bah Teiborlin u la ong ruh ba na ka liang ka shnong ka lah ban nang ai shuh shuh ïa ka jaka lada ka sorkar lyngba ka tnat pulit ka dang kwah ban pynheh ïa ka jaka ban tei ïa ka ‘out post’.
