Nongstoiñ, Rymphang 29
Ki nongïalam jong ka Voice of the People Party (VPP) ki la bteng ban leit pynshai paidbah ïa ki nongrim jong ka seng bad ka thong na ka bynta ka Jylla, bad ha ka Sngi Palei la pynlong jingïalang ha thaiñ Ri Mulliang.
Ha kane ka sngi la don lang u Bah Ardent M Basaïawmoit, President ka VPP, u Dr. Ricky AJ Syngkon kyrtong MP ka seng bad kiwei kiwei.
Ha katei ka jinghiar jong ki nongïalam ka VPP sha katei ka thaiñ, kala pynlong ruh ïa ki nongkitkam ka Congress na ka Ri Mulliang Zone ba kynthup ïa u Bah Marbor Nonglang uba bat kam General Secretary lem bad ki nongbud ki jong u, ki la leit ban pynïasoh bad ka VPP.
U Bah Marbor Nonglang u la ong, hadien ba ki la mih noh na ka Congress, ki la ïoh ban pynïasoh noh sha ka VPP bad la pynskhem ïa ki da u President Bah Ardent M Basaiawmoit.
Shuh shuh u Bah Marbor Nonglang u la ong ruh ba ka jingmih noh jong u lem bad ki nongbud na ka Congress kam shym la don kano kano ka daw lane ka jingkynthoh ïa ka seng, hynrei ka daw ka long namar ba ki kwah ban pynïasoh noh sha ka VPP.
U la ong ruh ba haba peit mynta hapoh ka jylla, la ïohi satang ïa ka VPP ka seng kaba dang i don jingkyrmen ïa ka lawei jong ki khun ka bri u hynñiewtrep.
