Shillong, Rymphang:
Ha ka sien banyngkong, u Myntri Rangbah ka Jylla, u Conrad K. Sangma ha ka Sngi Ba-ar u la ai jubab halor ka Mang Tyngka ha ka rukom ka bym pat ju leh mynno-mynno, da kaba pyndonkam ïa ki kor ka juk teknoliji ban ïadon bynta bad ki nongshong shnong ka Jylla.
Haba wanrah ïa ka rukom thymmai ha ki lad pynïasoh ka Sorkar, u Myntri Rangbah u la jubab halor ka Mang Tyngka lyngba ki kor ka juk stad teknoliji. Ïa ka jubab u Myntri Rangbah la pyni ha ka ‘screen’ kaba heh hapoh ka ïingdorbar bad ha kajuh ka por, lyngba ki rynsan lad pathai ba kynthup ïa ka ‘YouTube’ bad ‘Facebook’ lyngba ka Meghalaya Assembly Channel.
Ka rukom wanrah jong u Myntri Rangbah ïa katei ka sienjam lyngba ki kor ka juk stad mynta kaba kyntiew ym tang ïa ka khuid ka suba hynrei ka pynkup bor ruh ïa ki nongshong shnong da kaba pyni sha ki ïa ki jingbatai bniah halor ki thong bad ki sienjam jong ka Sorkar.
Ha ka jubab jong u halor ka Mang Tyngka, u Sangma u la kdew ïa ki thong jong ka Sorkar, kiba rah ïa ka Jylla sha ka ïoh ka kot kaba 10 ‘Billion Dollar’ bad ka lad ai kam ai jam sha 5 lak ngut.
U la pynshai ruh halor ki thong jong ka Jylla da kaba kdew ïa ki projek ki ban pynwandur ïa ka Jylla.
U Lamphang ka ïingdorbar thawaiñ, u Thomas A. Sangma na ka por sha ka por u la ïai ban halor ka jingminot ka ïingdorbar thawaiñ ban ting ïa ka sienjam kaba neh haba phai sha ka jingpynïaid kam hapoh ïingdorbar.
Kane ka Dorbar Mang Tyngka ka la long u mawjam haba ïadei bad kane ka sienjam. Ha shi lynter jong ka Dorbar, ka jingsam ïa ki kot lyngkdop halor ki thup ‘Business’, jingkylli, ‘Motion’, ‘Resolution’ bad kiwei-kiwei la kham pyrkhing bad ïa ki kot ki sla donkam la buh ha ‘NeVA website’ bad ha ‘website’ ka Meghalaya Legislative Assembly.
Ha ka sien banyngkong, u Myntri Rangbah u la wanrah ruh ïa ka Mang Tyngka na bynta u snem 2024-25 khlem ka jingpyndonkam ïa ki kot ki sla. Ïa ka jingkren halor ka Mang Tyngka la pynbiang sha ki paidbah ha ka ‘NeVA website’.
