Shillong, Rymphang 29
Ka jingshah thombor ka longrynïeng jong ki khynnah kynthei ka la jubor bha ha ki snem jong ka jingwan lynshop ka khlam Covid-19, kata ha u snem 2020 bad 2021, bad tang ha kine ki snem, ki jingujor hapoh ka aiñ Protection of Children from Sexual Offences (POSCO) Act 2012, ki la kot shaduh ka 743 tylli.
Ki jingujor hapoh ka aiñ POCSO Act halor ka jingshah thombor bad shah leh be-ijot jong ki khynnah kynthei ha u snem 2020 ki long haduh 365 tylli bad ha u snem 2021 ki la kot sha ka 378 tylli.
Ka Meghalaya State Commission for Protec-tion of Child Rights (MSCPCR) ka la pyntip ba ka East Khasi Hills District ka dei ka district kaba don bun eh ki jingujor hapoh ka aiñ POCSO Act ne ki kam leh be-ijot bad thombor ïa ki khynnah kynthei bad ka South Garo Hills ka dei kaba duna tam napdeng ki 12 tylli ki District ka jylla.
Kane ka long katkum ka jingai jingtip jong ka MSCPCR kaba la ong ba naduh ba sdang pyntreikam ïa ka POSCO Act 2012, ka jingujor kaba nyngkong eh ba la pynrung hapoh kane ka aiñ ka dei ha ka 4 tarik Jylliew, 2013 hapoh ka ïingbishar POCSO ka East Khasi Hills District bad haduh mynta ki la don haduh 2,566 tylli ki jingujor ha kaba 1,984 tylli ki dei kiba dang don hapdeng ka jingbishar jong ki ïingbishar bapher bapher jong ki District ka jylla.
Shuh shuh ka kaiphod ka ïathuh ba haduh mynta, ka jingpyndep ban bishar (dispose) ïa ki jingujor hapoh ka aiñ POCSO Act ha Meghalaya ka long tang 22.68 na ka 100.
Haba phai sha ki District, kaba bun duh tam ba la pynrung ïa ki mukotduma ha ki ïingbishar POCSO ka dei ha East Khasi Hills, kaba la kot haduh 709 tylli bad kaba long haduh 28% na ka jingdon ki jingujor POCSO hapoh ka jylla, katba ka South Garo Hills ka dei kaba duna tam ki jingujor da 64 tylli kaba long tang 2%.
Haba phai pat sha ka jingrai pynrem ïa ki nongleh bymman, lah ban kdew ba ka Ri-Bhoi District ka la wan ha khlieh duh ha ka jingdon ki ‘riewbymman ba shah rai pynrem, kaba kot haduh 50 tylli bad la bud da ka West Khasi Hills kaba kot 31 tylli bad ka East Khasi Hills kaba kot 30 tylli ki mukotduma.
Ha South Garo Hills bad ka South West Garo ym pat don satia ki ‘riewbymman kiba la shah rai pynrem haduh mynta bad kane lehse ka lah ban dei namar ka jingbym don ki Special Public Prosecutor (SPP) ban ïakhun ïa ki mukotduma bad dei namar kata ba baroh ki mukotduma POCSO ki la sahkut lut ha ka ïingbishar jong kine ki District.
Lah ban kdew ba ka South West Garo Hills district ka la don ïa ka ïingbishar POCSO naduh u snem 2017 hynrei watla katta ym pat don satia kawei ruh ka mukotduma ha kaba ki ‘riewbymman ki la shah rai pynrem.
