Shillong, Rymphang 29
Ki dkhot ka Khasi Student Union-Laban Circle ki la mih naduh dangstep ban leit shna ïa ka ïing ha Maxwelton Estate kaba don ha Laban na ka bynta ban phah sah ïa ki samla pule kum ka dak ban pyni sha ka sorkar ba kam lah ban kyndang ïa ki bar jylla kiba sah be-aiñ ha kane jaka.
Ki dkhot ka KSU Laban Circle hapoh ka jingïalam u President, samla Rueben Najiar ki la mih naduh ka por 7:00 baje mynstep jong ka 29 tarik Rymphang ban shna ïa ka ïing kaba la ker bad tap da ki tin.
Kane ka jingleit shna ïing ka dei namar ka seng kaba la leit ujor la bunsien hynrei ka sorkar kam shym la leh eiei, katba ki bar jylla kiba sah ha katei jaka (Maxwelton Estate) ki la sdang ban kharoi namar haduh mynta ki la poi haduh 70 tylli ki ïing.
U samla Rueben u la ïathuh ba kane ka ïing la shna tang kawei bad kin sa shna shuh shuh ban phah sah ïa ki samla pule ki bym don jaka sah.
U la maham ruh ba lada ki bor sorkar ki pynpra ïa ka ïing ba la shna da ka seng, ka seng ruh kan sa leit ban pynpra hi ïa ki ïing jong ki bar jylla kiba sah ha kane ka jaka kaba don palat 9 akar ka jingheh.
Une u nongïalam u la ong ba lada kiwei ki seng ki pynshna ïing ïa ki bar jylla, kam don jingeh ïa ka KSU ban pynshna ïing lang ïa ki paradoh ha kane ka jaka.
Ha kane ka sngi, u General Secretary ka KSU samla Donald Thabah ryngkat ka jingsynranlang ki dkhot ka KSU uba la poi lang ha kane ka jaka, u la lap dalade ba ki bar jylla kiba sah ha Maxwelton Estate kaba don ha Kenches Trace, Oxford Hill and Rilbong kiba pyntuid ïa ki jaboh sha ka wah kaba tuid sha Umshyrpi.
Une u nongïalam u la lap ruh ba kine ki bar jylla kiba la sah ki la ri masi ha jaka ba hap ha municipal kaba la khang ban ri jingri.
Ha kane hi ka sngi, u samla Donald Thabah u la ïoh ban plie noh ïa ka ïing ba la shna da ka KSU Laban Circle ha Maxwelton Estate khnang ban ai jaka sah sha ki paradoh ki bym don jaka sah khnang ban ïada na ka jingkharoi ki bar jylla kiba sah ha kane ka jaka.
Hadien katto-katne kynta, ki majistor ha ryngkat ka jingsynran lang ki pulit ki la wan ïakynduh ïa ki nongïalam ka KSU ha katei ka jaka.
Ha kane ka sngi la sakhi ruh ha shi lynter rud surok kaba don hajan kane ka ïing ba dang shu dep shna, ki dkhot ka KSU ki la wah ïa ki jingthoh pyrshah ïa ka sorkar.
Katba ha ka por janmiet ki dkhot ka KSU Laban ki la leit ban ïakynduh ïa ka Deputy Commissioner, East Khasi Hills District ka Kong RM Kurbah kaba la kular ban thoh sha ka Municipal ba ym dei shuh ban shah ri masi ïa ki briew kiba sah ha Maxwelton Estate bad ym dei ban pyntuid jaboh sha ki wah.
