Shillong, Rymphang 29
U Myntri ka tnat Social Welfare, Bah Paul Lyngdoh, u la ong ba ka jingshongkha khynnah ka wanrah ha ka jingkiew jong ka jingpep skul shiteng por bad ruh ka jingduk hapoh ka jylla.
Haba kren sha ki lad pathai khubor ha ka Sngi Palei, u Myntri u la ong na ka bynta ban khanglad ïa ka shongkha khynnah hapoh ka jylla, na ka liang ka tnat kan nang pynkhlaiñ shuh shuh ïa ki jingïalap ban pynsngewthuh paidbah halor ka jingma kaba ap.
U Myntri u la ong ba ka jingshongkha khynnah ka dei ka dawbah jong ka jingkiew ka jingpep skul shiteng por hapoh ka jylla kaba la ktah shi katdei eh khamtam ban long ruh sa kawei pat ka daw jong ka jingduk.
U Bah Paul u la ong ba ka jingshongkha khynnah ka jur bha ha ki thaiñ shabar na nongbah Shillong.
U la ong ba ka jingpynkylla sha ka ktien Khasi ïa ka aiñ POCSO Act, 2012 kan ïarap shibun ban ai jingtip sha ki paidbah bad ha ka imlang sahlang, ba kino-kino kiba dang dei khynnah kin nym lah ban ïashongkha bad pyntip ruh ba lada don mano-mano kiba shongkurim bad kiba dang khynnah kin ngat hapoh ka aiñ POCSO.
“Ka tnat ka la leh ka jingwad bniah kaba tista bha bad ka sngew ba ka long kaba donkam ban ïalap bad pynsngewthuh paidbah halor ka jingma na ka kam shongkha khynnah,” la ong u Bah Paul.
Nangta u la ïathuh ba ha u snem 2023, ka tnat ka la pyntreikam ïa ka Early Child Development Mission (ECDM) ban ïatreilang bad ki kmie ki kpa ha ka ban kyntiew ïa ka bha ka miat ki khunlung khynnah naduh 0 haduh 8 snem.
“Ka jingdon ka ECDM, ka Sorkar kan ïarap ïa ki kmie ki kpa ban sumar bad prat lynti kumno ban kyntiew ïa ka bha ka miat ki khunlung khynnah, ban ïada ïa ki khun na ka jingshongkha khynnah hadien-habud,” u la ong.
