Shillong, Rymphang 29
U MLA ka BJP na South Shillong konstitwensi, Bah Sanbor Shullai, u la kubur u khlem kren ha Ïingdorbar namarba u don ha ka Liang Synshar hynrei bun ki mat kiba u la kren bad phah jingthoh ruh sha ka Sorkar Pdeng.
U Bah Sanbor u la kren ïa kane ban pynphai nia ïa ka jingkren u nongïalam ka Congress Legislature Party (CLP), u Bah Ronnie V Lyngdoh uba la kynthoh ba u Bah Sanbor u khlem kren ha Ïingdorbar kum ka jingpynphai nia halor ka jingkynthoh u Bah Sanbor ba u MP ka Congress na Shillong u Bah Vincent H Pala u shu ktha sohot ha kyndong baroh san snem.
Haba kren sha ki lad pathai khubor ha ka Sngi Palei, u Bah Sanbor u la ong ba ha ki por ba la leit u la kren bha haba ïadei bad ki mat kiba ktah ïa ka jaitbynriew naduh ka por ba thmu ban pyntreikam ïa ka Citizenship Amendment Bill kaba la kylla ka CAA, nalor ka ILP bad kiwei kiwei ha kaba u la phah jingthoh ruh sha ka Sorkar Pdeng.
U Bah Sanbor u la ong ba kam long kaba shisha ka jingkren jong u Bah Ronnie namarba ha ka por COVID-19 ruh dei ma u uba kren bha ha Ïingdorbar ha kaba ka Sorkar Jylla ruh ka la mang ` 50 lak man la ka konstitwensi ban kyrshan ïa ki paidbah naduh ki mar bam, bad kiwei kiwei ki jingdonkam katba lah namar ki paidbah ki la shah ktah ha kato ka por.
U la ong ba ha kane ka Dorbar Mang Tyngka ruh u wan sha Ïingdorbar baroh shitaïew bad u khlem kren ha Ïingdorbar namarba u don ha ka liang synshar khamtam namarba u la dep kren man ka sngi ïa ki ophisar bad ki Myntri Sorkar haba ïadei bad ki kam pynroi kiba dei hapoh ka konstitwensi.
U Bah Sanbor u la pynkynmaw ba ha ka por ba ka HYC ka pynlong ïa ka jingïalang ha Madan Student ban pyrshah ïa ka CAB, ma u kum u MLA ka BJP u la kren pyrshah bad aiti ruh ka jingthoh sha ka Sorkar Pdeng kynthup sha u Amit Shah bad u Narendra Modi ban pyllait ïa ka Meghalaya na ka CAA ha kaba la pyllait ïa ka jingpyntreikam ïa ka CAA ha ki jaka kiba hap ha Schedule Area.
U la ong ba wat lada u khlem kren ha Ïingdorbar hynrei u khot bad ïakren bad ki ophisar man la ka sngi haba ïadei bad ki jingdonkam ban wanrah ki kam pynroi bad u ngeit ha ka jingong ba ki kam ki kren kham jam ban ïa ka ktien bad kine ki dei kiei kiba u leh mynta.
Halor ka jingong jong u ïa u MP ka Congress ba shu ktha sohot ha kyndon, na ka liang une u MLA ka BJP u la ong ba ka long kaba shai bad kaei kaba ki paidbah ki ïohi ka shai kdar ba donkam ban jied ïa ka BJP ban wanrah ki kam pynroi sha kane ka Jylla. Namar kata, u la kyntu ïa ki paidbah ba ha kane ka ilekshon Lok Sabha ban wan, ki dei ban jied beit ïa ka BJP namar kan sa wan biang ka BJP ha ka bor synshar ha ka ri.
U Bah Sanbor u la ong ba lada ki paidbah ki jied ïa kiwei ki seng ruh ka long hi kumjuh kumba jied ïa ka Congress namar kan shu lehnohei ka por namar ka BJP kan wan biang ha ka bor synshar.
“Ki paidbah ka jylla ki dei ban ai ka jingkyrshan ïa ka BJP namar ki paidbah nongkyndong ki tip bha ïa ki skhim kiba ki ïoh ha ka jingïalam jong u Modi kum u Myntri Rangbahduh ka Ri. Ngi dei ban jied ïa ka BJP bad pynjop ïa ki kyrtong jong ka BJP ban ïoh long Myntri jong ka Sorkar Pdeng,” la ong u Bah Sanbor, uba kwah ban ai tiket ïa ka Kong Fenela L Nonglait kum ka kyrtong jong ka BJP na Shillong Parliamentary konstitwensi.
“Lada jop kiwei ki seng ruh kin hap ban shong hi ha kyndong. Ka ilekshon MP ka ïapher na ka ilekshon MLA ne MDC, bad ka dei na ka bynta ka jingmyntoi ka Jylla lada jied ïa ka BJP,” u la ong.
Kumta u la kyntu ïa ki paidbah ba ki dei ban kiar na kine ki jingshah pynbiej da ki jingrwai bad jingpynshit kiba wanrah da ki mat kiba laiphew jait ban pynngop hynrei san snem ki paidbah kin shu thap shyllang.
