Shillong, Rymphang 29
Ka A’chik Holistic Awakening Movement (AHAM) jong ka East Khasi Hills Zone bad South West Khasi Hills Zone ki la ujor sha ka Deputy Commissioner, East Khasi Hills, Kong RM Kurbah, halor ka jingkynnoh ba ka don ka jingkit be-aiñ ïa u mawshun ha khappud India-Bangladesh.
Ha u kyrwoh khubor, u Labius Arengh, President ka AHAM East Khasi Hills Zone lem bad u Crownbetter T. Sangma, President AHAM South West Khasi Hills Zone, ki la ong ba ki leit rah ïa ka jingujor sha ka Kong Kurbah ha ka 23 tarik Rymphang.
Kitei arngut ki la ong ba na ka liang ka Directorate of Mineral Resources (DMR) ka ailad ban kit tang 12 ton u mawshun. Hynrei ki la kynnoh ba ki trok ki ïohlad ban kit haduh 25-26 ton kawei ka trok kaba long pyrshah ïa ka jingbthah jong ka sorkar.
Shuh shuh ki la kynnoh ba ka don ka jingïapher ha ka jingshim khajna. Katba ka dor ba la buh da ka sorkar ka long tang T.200 shi trok, ki jaka thew lane ki ‘weighbridge’ ki shim haduh T.1,700 shi trok.
Namarkata, ka AHAM ka la kyntu ïa ka Kong Kurbah ban pynkut noh ïa kitei ki jingleh be-aiñ. Ha kajuh ka por, kane ka seng ka la pynrem jur ïa kine ki kam be-aiñ khamtam ha ka thaiñ Bholaganj-Majai jong ka East Khasi Hills.
