Shillong, Rymphang:
Ha ka 23 tarik mynta u bnai, ha ka por kumba 1:10 mynsngi, la ïoh pdiang ïa ka ‘phone call’ na thanat Madanrting na u 112, NERS ba uwei shynrang briew u bym ithuh satia ïa kaba ka dur bad ka jingbatai bniah la kdew harum, la lap ba u la thiah hapdeng ka jingbym tip briew ha Happy Valley hajan ka pom-um ka MES, Wahumkhen.
Mar-mar la pynkit noh ïa u sha Civil Hospital, Shillong na bynta ban phah peit bniah hynrei ha mar ba poi ha katei ka jaka sumar, u MO uba don ha katei ka jaka u la ong ba u la khlad noh shuwa ban poi.
Kumba ka long, la leh ïa ka jingtohkit lem bad kiwei-kiwei ki jingdonkam. Hadien kane, ïa ka met jong utei u briew la buh ha jaka buh metïap ka Civil Hospital, Shillong na bynta ka jingithuh bad jingkam.
Utei u briew u don hapdeng ka rta 30-40 snem bad u don ïa ka jingjrong kaba 4.5 phut. U phong ruh ïa ka ‘sweatshirt’ rong jngum bad ka ‘sweater’ ba thoh rong lieh, ka ‘vest’ ba ïong bad ki juti rong jngum.
Ki bahaïing-bahasem jong uno-uno u briew uba jah ki lah ban pynithuh ïa utei u briew uba la khlad noh ha Civil Hospital, Shillong bad kynjoh sha kine ki nombor – 0364-2231408 bad 0364-2222214/2222215.
Ha kawei pat ka jingjia, ha ka 26 tarik mynta u bnai ha ka por kumba 11:50 mynstep, la ïoh pdiang ïa ka ‘phone call’ ha Cantonment Beat House na u UBC, K. Wahlang, nongïaid pahara ha Lad Ïew Mawlong ha kaba u la pyntip ba uwei u Garnet Sangma ïa kaba ka dur bad ka jingbatai bniah la kdew harum, la lap ba u la thiah ïap ha kawei ka lynti khim hadien jong ka jaka leit bar paidbah jong ka jaka ïeng bos ha Mawlonghat, Shillong. Hadien kane, la pynlong ïa ka jingtohkit bad la leh ruh ïa kiwei-kiwei ki jingdonkam.
Hadien kane, la pynkynriah noh ïa ka met jong utei u rangbah sha NEIGRIHMS, Shillong bad hadien ka ‘Post Mortem’, ïa ka met jong u la buh ha jaka buh metïap ka NEIGRIHMS na bynta ka jingithuh bad jingkam.
Utei u rangbah u don kumba 50-56 snem ka rta bad u don ka jingjrong kaba 5.4 phut. U don ïa u shñiuh uba lyngkot bad rong byrthup shiteng kumjuh u tmaiñ.
Ki bahaïing-bahasem jong uno-uno u briew ba jah ki lah ban pynithuh ïa utei u briew uba la khlad noh ha NEIGRIHMS, Shillong bad kynjoh sha kine ki nombor – 0364-2224818/2224400 bad 0364-2222214/2222215.
Kane ka long katkum ka kyrwoh na u Superintendent of Police ka East Khasi Hills, u R. Ravi.
