Shillong, Rymphang 29
Ka Executive Committee (EC) jong ka Khasi Hills Autonomous District Council (KHADC) hapoh ka jingïalam jong u Deputy Chief Executive Member (CEM) ka Council, u Bah Pynshngaiñ N. Syiem ha ka Sngi Palei jong 29 tarik u Rymphang ka la pynlong ïa ka jingleit jurip ha ka sien kaba khadduh ïa ka Khasi Heritage Village ban pynlong ïa ka Monolith Festival 2024 ha Mawphlang.
Kum ban shu pynkynmaw ba ïa kane ka tamasa kaba long ruh ka ïew pyninam ïa ki tiar bad ki jingbam tynrai jong u khun Khasi-Khara kan sa sdang naduh ka 7-9 tarik Lber.
Haba kren sha ki lad pathai khubor, na ka liang u Bah Pynshngaiñ N. Syiem, u la ïathuh ba ka jingpynkhreh ha kaba ïadei bad kane ka tamasa ka la dep kumba 95% na ka 100% bad ki dang sah sa tang katto katne tylli ki kam ban pyndep bad u ngeit skhem sa tang hapoh shisngi ne arsngi eiei la lah ban pyndep lut ïa ki kam baroh na ka bynta ban pynlong ïa katei ka tamasa.
“Ka jingmut jong ka Council ban wanrah bad pynlong ïa ka Monolith Festival ka dei ka ïew pyninam ka ban pyninam ïa ka rwai-ka siaw, ka shad-ka mastieh, ka tem-ka put, ka bam-ka dih nangta ki tiar kiba shna ma ngi, ym dei tang katta hynrei kiba bun ki bynta kiba ngi hap ban pyninam hangne”, la ong u Bah Pynshngaiñ.
U Bah Pynshngaiñ u la ong ba ka jingmut jong ka Monolith Festival ka long ban pynlong ïa kane ka tamasa shisien shisnem kata man la u bnai Risaw hynrei namar ba ka Council ka don jingduna ha ka liang pisa ka tyngka kumta khlem lah satia ban pynlong man la u snem.
“Mynta ruh ngi ïatreilang bad ka Meghalaya Age Limited bad ka tnad ki kam jngoh kai pyrthei ban pynlong kumne kumba ka long”, la ong u Bah Pynshngaiñ.
U Bah Pynshngaiñ u la ong ba hapoh kane ka tamasa kin sa don shibun tylli ki dukan ki ban sa die ïa ki jait jingbam jingdih bapher-bapher, ki tiar ki tar, ki jingpyni nam ïa ki dustur tynrai u khun Khasi-Khara ha ka ban sa wan ban ïashimbynta da ki it-ki hima bad ki raid bapher-bapher kiba don hapoh ka thaiñ Khasi-Jaiñtia nalor kiwei-kiwei de.
La ïathuh ruh ha katei ka tamasa la pyntikna ba kin don 80 tylli ki dukan ne ki ‘stall’ khnang ba baroh kin ïa lah ban die lang ïa ki mar bam-mar dih bad ki jingdie jong ki.
La ïathuh ba kane ka tamasa kam dei tang ka ïew ïadie-ïathied hynrei ka dei ruh kum shibynta ban pynshlur bad ban ailad ïa ki khynnah samla jong ngi ba kin seng kam lajong.
Ha kane ka tamasa kin don ruh ki prokram pynbyrngia lyngba ki nongrwai bad ki nongtem-nongput na baroh kawei ka Ri Khasi kiba la pynkhreh da ki nongpynïaid jong kane ka tamasa.
Ka jingthmu haba pynlong ïa kane ka tamasa ka long ban pynpaw pyrthei ïa ka jingriewspah jong ka lariti bad ruh ïa ka jinglong kyrpang jong u Khasi lyngba ki tiar bad ki jingbam tynrai kiba don ha ki bynta bapher-bapher jong ka jylla.
