Babu Kular Khongjirem
Mynta, mih sa kawei ka mat (issues) kaba eh bha bad kata ka long, la ka Sorkar ka nud ne em ban pynduh pyndam (scrap-ped) ïa ka jingïateh soskular bad ka Indian Hotels Company Limi-ted ban shna ïa ka Taj Resort & Spa ha ka dewlynnong Lumpongdeng kaba don hapdeng ka pung Umiam ne pung Damsite.
Hadien ba la mih ka jingïakhih shah thngan (indefinite hunger strike) ba la pynlong da ka Green-Tech Foundation (GTF) pyrshah ïa katei ka kam thmu lilam ka Sorkar MDA I &II sha ka Company kaba nabar jylla, ka la mih ka jingpynshai na ka Sorkar lyngba u Chief Minister bad Deputy Chief Minister (Khasi Hills) jong ka Meghalaya ban pynksan jubor ban pynngeit ne pynbiej ïa ki paidbah ba bun. Ha kaba nyngkong u Chief Minister u pynshai ba katei ka Taj Resort ha Lumpongdeng ka long tang ka jingtei shipor (temporary structure). Kata ka jingtei shipor kan long pat haduh 50/60 snem. Hadien ba la pynshai bad pynphai nia kylla (re-act) da ka GTF, lyngba ki sakhi da ki kot ki dulir lyngba ka RTI, u Chief Minister u la sdang ban kylla ktien pat. Tang hadien shi sngi ba u la pynshai ban shna bad tei Resort shipor (temporary structure) ha Lumpongdeng, u la kylla ktien noh ba ka Sorkar kam don jingthmu ban tei Resort ha Lumpongdeng hynrei la pynkynriah noh sha ka jaka ba don ka Orchid Umiam. Ha Lumpongdeng yn shu shna dara tang ban ïoh leh byrngia (recreation) da ki Tourist. Kumno u Chief Minister u ai jingpynshai (give statement) shi sngi da kawei ka jingkren (statement) bad sa shi sngi pat da kawei pat ka jingpynshai (another different statement). Don aiu ha lyndet jong kane ka jingpyrshang tap eitmiaw bad pynksan jubor kine ki nongïalam kane ka Sorkar MDA.
Ban ai wai shipor sha ki Company kiba na shabar bad khlem burom shuh ïa ka Meghalaya Land Transfer Act,1972 kam dei satia ka kam kai ne ka kam kaba malu mala. Ka lah ban don ka jingïasngewthuh jingmut sop sop bad kine ki nongïalam bad kane ka Company. Phim lah ruh ban ong ba, lehse, ka company ka la ïoh ban ai bhah (shares) lem sha kiba ki la pynïoh ïa katei ka jaka. Lada ki la kum shim shisha ïa kata ka bhah sop sop (illegal shares) na ka Company, lada kin pyndam bad pynkut noh, ki dei ban pynphai noh (return/refund noh) ïa ka share jong ki lada ki kum pdiang na katei ka Company. Ban pynphai ïa kaba la ïoh, ka shait eh bha, wat tang shi hajar ne ar hajar ruh. Lada da ki klur lei, kata, sa tang ban shu pyn-eh ïa ïap ïa im beit triang bad pynksan jubor justi katba jia katba long. Phim lah ban ong, lehse, kane ka dei kawei na ka daw ba kine ki nongïalam Sorkar jong ngi kim da salia (adamant) than ban shimkhia ïa katei ka jingshah thngan (hunger strike) jong u Chairman jong ka GTF watla u la tlot palat mynta.
Hynrei, namar ba kine ki nongsynshar ki dei ki nongïalam ba la jied da u paidbah (elected Rulers), kumta ki dei ban don ka jingkitkhlieh ban pyndem ha ka sur jong ki paidbah lada ki paidbah ki ïa tylli shisha, lym kumta, ma ki bad ka seng jong ki kin sa shah ktah jur ym tang ha ka ilekshon MP shiteng samoi ka ban sa long shen na 1-Shillong Parliamentary Constituency hynrei khamtam eh ha ka ilekshon MLA ka ban sa long ha u snem 2028.
