Shillong, Rymphang 29
Ki nongkhwai dohkha kiba dei ki kynthei ki la lap ïa ka metïap u Bah Mathaios Wahlang, 28 snem ka rta, ha ka 29 tarik Rymphang ha ka por 1:30 nohphai sngi uba shong ba sah ha Nongtrai ha ki thaiñ Lawbah kaba hap ha Mawsynram Police Station, East Khasi Hills District na khrum jingkieng kaba don ha Nonglait hajan ka shnong Nongtrai. Une u briew u la jah na la ïing naduh ka 23 tarik Rymphang ha ka por 11 baje mynstep.
Haba pynthikna ïa kane, la ïoh ban ïakren bad u Bah Kering Wahlang uba dei bahaïing, u la ïathuh ba ïa ka met u Mathaios Wahlang la leit shimti noh bad lashai ka sngi (Sngi Thohdieng) yn sa pyndep noh ïa kaba sah.
Nangta u la ïathuh kiba lap ïa ka metïap ki dei arngut ki kynthei kiba leit khwai. Haba ki la ïohi, iwei na kine ka la leit kren hynrei haba ka la sngewthuh ba u briew u la khlad ki la mareh noh ban pyntip sha shnong.
U la ïathuh hadien ba la pyntip, ki bahaïing bahasem ha ryngkat ki pulit ki la leit pynshisha ïa ka met jong u Mathaios bad la wan kit noh sha shnong Nongtrai.
U Bah Kering u la pynpaw ba ki bahaïing bahasem kim kwah ban leh ‘post mortem’ namar kim don ka jingsuba ïan-ïano namar ki sngewthuh ba u briew jong ki u don ka jingduna haba u la dep jah teng ha kine ki bnai ba la dep.
U la ïathuh ba u Mathaios haba u jah ha kine ki sngi ka dei ka jingïaid kulmar nalor ba thngan u poi sha kane ka wah kaba don hapoh ka jingkieng.
Kumta, na ka liang u Bah Kering Wahlang u la ai khublei ïa baroh kiba la don bynta ban ïarap ïa ka ïing ka sem haba u bahaïing jong ki u jah na la ïing haduh ka sngi ba la lap hapoh ka khrum jingkieng ha Nonglait.
