Tura, Rymphang:
Ki nongtrei ka GHADC kiba ïakhih halor ka tulop kaba sahteng ki la rai ban wanphai sha ka kam naduh ka Sngi Palei wat la kam shym la don kano-kano ka jingkular kaba la ai na ki bor ba dei khmih, hadien ba ka jingai jingbit kaba 3 sngi na bynta ka jingshong kyllaiñ mungor ka la kut noh ha ka Sngi Balang.
U President ka NGEA, Brithen Sangma u la pynbna ïa katei wat hapdeng ka jingsngewsih, ha kajuh ka por da kaba pyntip ba yn sa shim ïa ki sienjam hadien halor kane ka mat.
Hashuwa, ka NGEA ka la ai por 7 sngi ïa ki bor pynïaid ban jubab halor ka jingdawa jong ki. Hynrei wat la ki bor ba dei khmih ki la jied ban kbum la ka shyntur, ka seng ha ka Sngi Balang ka la pynjlan ïa ka jingai por na bynta ki bor ba dei khmih ban leh eiei haduh ka 10 tarik u Lber.
“Ngi da sngewsih shisha ba ki bor ba dei khmih kim shym la jubab ïa ka jingdawa jong ngi. Hynrei, naba ka jingai jingbit na ki bor distrik ka long tang na bynta 3 sngi, ngin wanphai sha ka kam naduh ka Sngi Palei,” la ong u President ka NGEA, u Brithen Sangma.
U Sangma, haba kyrpad ïa baroh ki nongtrei ban wanphai sha ka kam, u la kyntu ïa ki bor ba dei khmih ka GHADC ban jubab hapoh ka 10 tarik u Lber ha ryngkat ka jingbyrngem ba ka jingïakhih ba khlem buh por kan sdang naduh ka 11 tarik Lber lada kam don kano-kano ka jubab hapoh jong katei ka jingai por.
Ha kawei ka liang, ka A’chik National Youth Organization (ANYO) ka la kner ïa ka jingkyrshan sha ki nongtrei ba ïakhih da kaba kular ban rah ïa kane ka mat sha ki bor ba dei khmih.
