Nongpoh, Rymphang 29
Ki nongdie mar thok kiba wan na shabar ka jylla bad kam ïalade kum ki shipai lane ki mynnong jong ki kompeni bapher bapher ki ïaleh ban pyrshang bad pynbiej ïa ki paidbah ban thied ïa ki tiar ki tar ba kynthup naduh ki mobile phone, ki power bank, ki earphone, ki baje bad kiwei kiwei. Ki nongdie mar ki la sdang ban poi sha kylleng ki jaka jong ka jylla bad kumta ki paidbah kin hap ban long kiba husiar ban nym shah pynngop.
Haba ïoh ban ïakren bad uwei u samla u bym kwah ban pynpaw kyrteng uba la ngat ha kane ka jingshah thok, u la ïathuh ba ki la don ki bar jylla kiba kam ïalade ba ki dei ki shipai, ki la wan ban tyrwa ïa bun ki tiar ki tar ‘electronic’ kiba dei ki mar thok lane kita ki ‘duplicate’ kiba ju ong ha ka ktien phareng.
Une u samla u la ïathuh ba ha kata ka jingwan tyrwa, u la kum thied ïa kawei ka iPhone 14 Pro ha ka dor T.30,000 kaba la song bha bad long thik kum ka iPhone kaba shisha lada shu peit najrong na ka dur ka dar. Kum ban shu pyntip khyndiat, ka dor jong ka iPhone 14 Pro (128 GB) ka dei kumba T.1.19 lak hynrei namar ka jingïoh tad dor, utei u samla da ka mynsiem jong ka jingkmen u la thied ïa katei ka phone na kitei bar jylla.
U la ïathuh ruh ba haba u pyrshang ban pynim (switch on) ïa ka mobile kaba u la thied hakhmat kitei ki nongdie mar thok, ka shu paw tang ba mih ka shap Apple bad ka lip noh. Kumta kitei ki nongdie mar thok ki pynbiej ïa u da kaba ong ba ka la lut ‘battery’ bad donkam ban ‘charge’ shwa ban pyndonkam.
Wat la katta, da ka mynsiem jong ka jingsngew donbok bad sngewkmen ba la ïoh tad dor kat ïa ka iPhone 14 Pro, utei u samla u la leit mareh wut-wut sha la ïing ban ‘charge’ ïa ka phone kaba u la thied thymmai. Pynban phewse kumba ïuh tdong bseiñ, katei ka iPhone 14 Pro kaba u la thied kam dei satia ka iPhone, hynrei ka dei kaba don tang ïa ka dur jong ka iPhone najrong katba ka software jong ka shapoh pat ki dei jong ka Android nalor ba ka ‘speaker’ bad ka ‘camera’ jong katei ka phone ruh kim long satia.
Kumta khnang ba kiwei pat ki paidbah kin nym ngat ha kane ka kam thok kam shukor, utei u samla u la kyntu ïa ki paidbah ba ki dei ban long kiba husiar bad phikir ban thied kulmar ïa ki tiar ki tar, khamtam ha kaba ïadei bad ki tiar electronic na ki briew kiba wan ban tyrwa ha ka dor kaba tad khnang ba kin nym shah thok kumba ma u, u la ngat.
