Shillong, Rymphang 29
U MLA ka BJP na South Shillong konstitwensi, Bah Sanbor Shullai, u la ong ba kam long ïa u ban kren eiei halor ka jaka ha Maxwelton Estate namar kane ka kam ka dang sahteng bad ka don ha Ïingbishar lane ‘sub judice.’
Haba kylli ki nongthoh khubor la ma u kum u MLA, u tip ne em ba don ka jingkynnoh ba wat lada kane kam ka dang sahteng ha Ïingbishar, hynrei ki jingshna thymmai pat ki don ha katei ka jaka, u Bah Sanbor u la ong ba um don jingtip kum kata.
Ka Khasi Students’ Union Laban Circle kaba la dawa ban weng noh ïa kiba sah ha Maxwelton Estate na ki bor district ka East Khasi Hills district, ka la sdang ban shna ïing ha katei ka jaka bad khot ïa ki Khasi ban wan sah ha katei ka jaka kaba ki la ong ba ka dei ka jaka jong ka Sorkar kaba shu kyntur da ki bym dei Khasi bad kiba ïoh ban sah hangtei.
Wat hadien ba la dep ïakynduh ïa ka Deputy Commissioner ka East Khasi Hills District ka Kong RM Kurbah, ka KSU Laban Circle ka la ong ba na ka liang ka seng kan bteng ban shna ïing hangtei ha jaka jong ka Sorkar namarba kiwei pat ki bar Jylla ki bteng ban wan sah wat lada ka DC ka batai ba kane ka kam ka dang don ha Ïingbishar.
Ka KSU Laban Circle ka la kynnoh ba ki don ki briew kiba ïoh ban leit sah hangtei wat lada ka kam ka dang don ha Ïingbishar bad kine ki briew ki ïoh ruh ïa ka dur thep vote (EPIC) kaba pynlyngngoh bad mih jingkylli kumno ki ïoh EPIC bad mano ba ai jingbit ïa ki.
Ka KSU ka la dawa na ka DC ban leh ei ei noh namar ka jingïohlad jong ki ban sah hangtei ki la ri ruh ki jingri bad pynjaklia ruh ïa ka jaka bad pyntuid jaboh.
Khyndiat snem mynshwa ka Sorkar Jylla lyngba ka Kynhun Myntri ka la mynjur ban pynkylla ïa ka Maxwelton Estate kum ka ka Public Park, hynrei ka khlem urlong namarba don kiba pyrshah.
