Nongstoiñ, Rymphang 29
Ka Hynñiewtrep Youths’ Council (HYC) West Khasi Hills District ha ka Sngi Palei ka la dawa na u Deputy Commissioner (DC) ka West Khasi Hills ba un pynbeit noh shaid-shaid ïa ka eksam DSC hapoh ka District ïa baroh ki kam kiba lait khnang ba ki samla wad kam kin ïoh mynsiem, namar lada slem kim ïohlad shuh naduh bym pat pynbeit ïa ka Roster System.
Halor kane ka bynta, u samla Lumlang Kharsyiemlieh, President ka HYC West Khasi Hills ryngkat ki dkhot ki la leit ban ïakynduh ïa u DC ban ïakren halor kane.
U samla Lumlang u la ong ruh ba kumba long mynta, la ïohi ha ki lad pathai khubor ba ka DSC Eastern West Khasi Hills District ha ka 26 tarik u Rymphang 2024, ka la ïaid shaid-shaid ban pyllait byrta (Advertisement) ïa ki kam bapher bapher, kaba la kdew ruh 80% Khasi bad Garo, bad 20% na ka bynta ki Un-Reserve (UR). Nangta shuh shuh u Myntri ka Jylla u Conrad K Sangma ha ka Dorbar ha Assembly u la ong ki Deputy Commissioner ki District ki dei ban ïaid shakhmat ban pynlong ïa ki eksam bad interview lyngba ki DSC, bad kim donkam shuh ban phah sha ka tnat personal, khnang ba ka kam kan kham kloi.
“Ngi sngewthuh ba ka jingkren u Myntri Rangbah ka aibor ïa u DC ban leh ïa kaba donkam, ngi ngeit bad bad ngi kyrmen ha District jong ngi ruh kan ïaid shakhmat ïa baroh ki kam kiba lait ha baroh ki tnat bad ka DSC kan pynïaid ha ka lynti khuid bad suba kumba la ai jingthoh da ka seng ha ki bnai ba la dep,” ong u samla Lumlang.
U la ong ruh ba ka HYC ka kyrmen ba u DC un shimkhia halor katei ka bynta, ba kan wanrah ïa ka District ha ka dur kaba itynnad bad kaba shai ban wanrah ïa ka khuid ka suba ïa ka DSC.
Shuh shuh u samla Lumlang u la ïathuh ba ha kane ka jingïakynduh, u DC u la kular ban shim khia bad kular ruh ba mynta u snem kan sa don noh ka eksam, bad ba kin pynkhreh shaid-shaid ban leh ïa kaba donkam, ban pyndap ïa baroh ki kam kiba lait hapoh ka District bad ruh ban buh bhah kyrpang ïa kiba duna dkhot met namar kim lah ban ïakhun bad kiwei lada khlem buh kyrpang.
