Shillong, Rymphang:
Ka jingduna ki kot pule bathymmai jong ka Meghalaya Board of School Education (MBoSE) mynta u snem ha ki jaka die kot ka la wanrah jingeh shikatdei eh ïa ki kmie ki kpa, ki khynnah skul bad ki nonghikai ha kine ki sngi mynta khamtam lei-lei ba kane ka dei ka por ba ki skul baroh ki la sdang ban plie biang ïa ki jaka pule.
Halor kane ka bynta, na ka kiang ka seng Hynñiewtrep Youth Council (HYC) Education Cell sengkmie haba ïohi ïa kane ka jingeh kaba khraw, ka seng ha ka Sngi Balang ka 28 tarik u Rymphang 2024, ka la leit ban aiti da ka jingthoh sha u Myntri ka tnad pule puthi ka jylla, u Rakkam A. Sangma ban pyntip sha u ha kaba ïadei bad ka jingshem jingeh ki kynnah skul hapoh ka jylla ban ïoh ïa ki kot pule jong ki na ki jaka die kot.
Haba kren sha ki lad pathai khubor hadien ka jingwan ïakynduh ïa u Myntri ka tnad, u Education Secretary, u samla Enlang Sawian, u la pynpaw ba ka jingbym ïoh ïa ki kot pule ha ka por kaba biang ka la pynlong ïa ki nonghikai bad khynnah skul ba kin shem jingeh bad kan wanrah ruh ka jingduhnong kaba khraw bad ka jinghiar ha ka liang ka pule puthi jong ki khynnah skul.
“Ngi la ïohi ba kiba bun ki kmie ki kpa ki la pynpaw ka jingeh kaba khraw namar haba ki leit ban wad ïa kine ki kot kiba kynthup ïa ka kot English, Mathematics bad Science ha ki jaka die kot kiba don ha kylleng jong kane ka nongbah Shillong bad ha kiwei-kiwei ki distrik ruh kim shym la ïoh ïa kita ki kot,” la ong u samla Enlang.
U samla Enlang u la ïathuh ba ha ka jingïakren bad u Myntri ka tnad, u la ong ba ka jingpynmih ïa ki kot bathymmai katkum ka NCERT ka long kaba biang bad kaba pura.
U samla Enlang u la ong ba na ka liang ka seng ka kyrmen skhem ba ha kine ki sngi, ka tnad kan sa lah ban pynpoi lut ïa ki kot naduh ka English, Science bad ka Maths sha baroh ki khynnah pule bad kumjuh ruh sha ki skul.
“Ngi sngewthuh ba kane ka jingeh kaba khraw ka long ym tang ïa ki kmie ki kpa, ki khynnah skul bad ki nongpynïaid skul hynrei ka don ruh ka jingeh ïa ka tnad ruh namar ba ki la wanrah ïa ki jingkylla ha une u snem”, la ong u samla Enlang.
Namarkata, ka seng ka la kyrpad ïa u Myntri ba un tuklar lem ha kaba ïadei bad kane ka bynta namar ka jingduna jong ki kot pule ha ki jaka die kot ka la wanrah ka jingeh ïa ki khynnah skul khamtam ha kine ki sngi ba ka jingshim klas ïa ki khynnah skul ka la sdang ban ïaid shaid-shaid. Ka seng ka la kyntu ruh ïa u Myntri ba un shim khia mardor ban pyntikna ba hapoh kine ki 2-3 taïew, kitei lai tylli kot kiba dei ki kot kiba donkam katkum ka NECRT na ka bynta ki khynnah pule jong ka MBOSE, yn lah ban pynpoi noh mardor sha ki khynnah pule.
Na ka liang u Myntri u la pynshai ruh ba ha kine ki sngi, na ka liang ka sorkar kan ïaleh ban pynbeit bad ki nongpynmih ïa ki kot ba kin pynpoi noh ïa ki kot baroh kiba duna ha ki dukan die kot.
Shuh shuh na ka liang ka seng ka la pynpaw ruh halor ka jingrem eh ka bai skul ki khynnah bad kumjuh ruh halor ka jingrem jong ki kot ki sla hapoh ki skul kiba don hapoh ka jylla namar kiba bun ki khynnah pule hapoh ka jylla ki dei kiba duna ha ka ïoh ka kot khamtam kiba wan na ki thaiñ nongkyndong ki hap ban pynbiang ïa ka bai ïing, bai bam, ka bai leit bai wan bad khamtam eh ïa ka bai skul kaba buh jingeh pat ïa ki kmie ki kpa ba kin kyrshan bor ïa ki khun jong ki.
“Na ka liang ka seng ngi kwah ban shu kyntu ïa ki bor pynïaid lyngba ki lad pathai khubor ba ki bor pynïaid skul hapoh kane ka jylla Meghalaya baroh kawei ba kin peit bniah biang halor ka jingkiewdor palat jong ka bai skul bad ba kin pyrkhat lem na ka bynta ka bit ka biang bad khamtam eh ïa ki khynnah kiba wan na ki longïing-longsem kiba duna ha ka ïoh ka kot”, la ong u samla Enlang.
