Nongpoh, Rymphang 29
Ka jinghiar dor jong ki mar rep khamtam u synsar ka la wanrah ïa ka jingkthang shikatdei ha ki paid nongrep jong ka thaiñ Ri Bhoi kiba la sngew kut lad bad sngewduh mynsiem khamtam ha kum kane ka jingsdang jong u snem namar bun na ki longïing ki shaniah tylli na ka kam rep kam riang ban pynbit pynbiang ïa ka ïing ka sem bad bai skul jong ki khun.
Kawei na ki shnong kaba la mad ïa kane ka jingeh ka dei ka Sohkhwai kaba hap ha Nongpoh konstitwensi, ha kaba bun na ki paidbah ki dei ki nongrep kiba la pynpaw ïa ka jingdiaw mynsiem halor ka jinghiar dor kaba palat liam jong u synsar.
Uwei na ki nongrep synsar jong kane ka shnong, u Bah Diang Namsaw, u la ong ba ha kum kane ka por jong u snem, ki nongrep jong kane ka shnong ki ju shaniah beit ïa ka pisa kaba mih na ka jingdie na u synsar ban siew bai skul, ban thied ïa ki kot ki sla bad kiwei kiwei de ki jingdonkam ha ïing ha sem. Hynrei ka jinghiar dor kaba palat liam jong u synsar mynta u snem ka la buh jingeh shikatdei ïa ki nongrep.
Halor katei ka bynta, kum uwei na ki nongrep uba shah ktah, u la kyntu bad kyrpad ïa ka sorkar ba kan pyrkhat lem ban kyntiew ïa ka dor jong u synsar bad ruh ïa ki nongmihkhmat ka thaiñ ba kin ïakren lem bad ka sorkar jylla ban leh eiei halor ka jinghiar dor ki mar rep ba kynthup ruh ïa u sohniamtra, ka kait bad kiwei kiwei.
