Nongpoh, Rymphang 29
Ka Joint Action Committee (JAC) jong ki seng ba kynthup ïa ka Ri Bhoi Youth Development and Social Organisation (RBYDSO), Ri Bhoi Youth Federation (RBYF), Hynñiewtrep Youth Council (HYC), Hynñiewtrep Integrated Territorial Organisation (HITO), All Meghalaya Karbi Association (AMKA) lem bad ka Synjuk ki Rangbah Shnong Marmain Area (SRSMA) ha ka janmiet jong ka Sngi Palei ki la leit ban ujor sha u Deputy Commissioner (DC) ka Ri Bhoi District halor ka jingdon jong kawei ka seng kaba la byrngem ban nym shah buh ïa ki dur Jisu bad kiwei kiba ïadei bad ka niam Khristan ha ka Sacred Heart Secondary School ha Marmain.
Haba kren sha ki lad pathai khubor hadien ka jingkynduh ïa u DC, u Bah Dhiren Klein, nongïalam ka SRSMA bad u Bah Bistocan Timung, Secretary ka AMKA, ki la ïathuh ba katkum ka jingïoh jingtip na ki kmie ki kpa jong ki khynnah skul ka Sacred Heart Secondary School, Marmain, ka la don ka jingkynduh ba sop-sop jong kawei ka seng kaba la tip kum ka Karbi Traditional Faith Association (KTFA) ha ka 25 tarik mynta u bnai (Rymphang) ha khappud bad ka jylla Assam ha kaba katei ka seng ka la byrngem ba baroh ki dur Jisu ba kynthup ruh ïa u mot Jisu kiba don hakhmat katei ka skul ba ki dei ban weng noh, lym kumta kin sa pynpra hi.
Kane ka jingbyrngem bad ruh ka jingsaphriang jong ki dur (poster) lyngba ki lad pathai social media, ka la wanrah ïa ka jingkulmar jingmut bad jingsngewkhia jur ïa kiba bun ki nongshong shnong ka thaiñ bad khamtam eh ïa ki nongïalam shnong kaba lah ruh ban ktah ïa ka shongsuk shongsaiñ ha ka thaiñ kaba don marjan bad ka jylla Assam.
Ki la ong ruh ba kane ka jingleit ujor sha u DC ka Ri Bhoi ka long ban pynthikna ba kitei ki shitniam kiba don ïa ka jingthmu ban pynthut ïa ka shongsuk shongsaiñ jong ki paidbah kim dei satia ban ïoh lad ban pynurlong ïa katei ka jingthmu basniew ka jong ki bad ba ki bor jong ka aiñ ki dei ban shim khia ban pynlong ïa ka jingtohkit ïa kitei ki briew kiba pynthut ïa ka shongsuk shongsaiñ ha ka thaiñ.
Kitei ki nongïalam ki la ong ba ki paidbah jong ka thaiñ Marmain baroh shi katta ki don hapdeng ka shongsuk shongsaiñ bad kiwei de ki shnong khappud bad pyntip ruh ba ka dei ka sien ba nyngkong ba kum kine ki jingjia ki wan jia hapoh ka shnong ka thaw. Nangta ki la pynpaw ruh ïa ka jingsngewkmen ba u DC u la kular ban shim khia ïa kane ka kam bad ruh ban phah ïa ki bor pahara khnang ba kan nym don kano-kano ka huri-hura bad ka jingtieng jingsmiej ïa ki paidbah nongshong shnong ka thaiñ hi baroh kawei.
