Shillong, Rymphang:
U Myntri ba khmih ïa ka tnat Social Welfare ka jylla, Bah Paul Lyngdoh, ha ka Sngi Palei haba pynpaw ka jingsngewkhia, um sngew lah ngeit ba ki don ki district hapoh ka jylla kiba haduh mynta kim pat shym la don ka jingrai pynrem halor ki mukotduma POCSO.
U Bah Paul Lyngdoh u la pynpaw ïa kane haba ai jingkren kum u kongsan ha ka sngi ba la pyllait ïa ka kot POCSO Act ba la pynkylla sha ka ktien Khasi kata “Ki Kyndon Aiñ” ba la pynlong ha Pinewood Hotel ha ka jingdon lang ryngkat ka Myntri ka tnat Aiñ ka Kong Ampareen Lyngdoh, ka EM ka KHADC ka Kong Macdalyne S Mawlong lem kiwei kiwei ki kynrem ki lyndan na ki tnat treikam bapher bapher ka sorkar.
U Bah Paul u la buh ruh ka jingkylli ba kumno ka lah ban long ba yn dang long ‘Nod’ ne ym pat don ka rai pynrem halor kane ka aiñ ha ki katto katne ki district.
Shuh shuh u la ong ba ka don kaei-re-kaei haei-re-haei kaba dang jah bad kumta ka don ka jingdonkam ban pynbeit ïa ka.
“Nga don ka jingshaniah ba da ka jingïatreilang jong ka imlang sahlang, ngin lah ban tehlakam bad pynbeit mardor ïa kane ka jingeh bad mynta lei haba ïa ka aiñ POCSO la pynkylla sha ka ktien Khasi, ngi kwah ban pynthikna ba kan poi sha ki kyndong-kynshrot jong ki shnong bapher bapher,” la ong u Myntri.
Ha kawei pat ka liang, u Bah Paul u la ong, kane ka sngi kan dei ka sngi sah jingkynmaw namar ha ka sien ba nyngkong naduh u snem 1841 ba la ïoh ïa u dak Khasi, mynta ka sngi la lah ban pynkylla ïa ka aiñ POCSO ha ka ktien Khasi.
U la ong ba ym baroh ki la mad ka jingkmen ha ka jingim bad dei namar kane donkam kum ki nongthaw aiñ bad baroh ban ïasnoh kti lang ban rat dyngkhong ïa ki kam thombor pyrshah ïa ki khynnah.
Namar kata, u la kyntu ïa baroh kiba don ha kane ka sngi ban shim ka jingbam smai ban ïada ïa ki khynnah ha ka imlang sahlang na ka bynta ban wanrah ka jingkmen ha ka jingim jong ki.
Ha kane ka sngi, ka Meghalaya State Commission for Protection of Child Rights ka la pyllait ruh ïa ka almanak bad ka kaiphod (Preliminary report) jong ki POCSO mukotduma ha ki ïingbishar ka Meghalaya.
