Shillong, Rymphang:
Hadien ba kut noh ka jingai por ban dawa phah panmap halor ka jingkynthoh pyrshah ïa ka Hynñiewtrep Achik National Movement (HANM) ha ka sla ‘Facebook’ hapoh ka kynhun kaba la ai kyrteng kum “Ka Lympung Ki Khun Ka Ri” ba la thoh da u Hbk Lyngdoh, na ka liang ki nongïalam jong ka seng ha ka 29 tarik u Rymphang ki la leit ban buh da ka ejahar ha u Superintendent of Police (SP) ka East Khasi Hills District pyrshah ïa utei u nongkynthoh.
Kum ban shu kdew hangne, ka HANM ha ka 3 tarik u Naiwieng 2023 ka la leit ban ïakhih ha nongbah Delhi hapoh Jantar Mantar ban dawa pynrung noh ïa ka ktien Khasi bad Garo ha ka khyrnit baphra, ka jindawa ban pyntreikam noh ïa ka Inner Line Permit(ILP) hapoh ka jylla bad ban pynbeit noh ïa pud u sam hapdeng ka jylla Assam bad ka jylla Meghalaya.
Katkum ka jingkynthoh ha katei ka sla Facebook, utei u nongthoh u la kynthoh pyrshah ïa ka seng da kaba ong ba ka jingpynlong jong ka HANM ïa ka jingïakhih ha Jantar Mantar ha nongbah Delhi ha ka 3 tarik u Naiwieng 2023 ka dei kaba la bei pisa da ka National People’s Party (NPP).
Haba kren sha ki lad pathai khubor hadien ka jingwan ujor da ka ejahar, na ka liang ka seng ka la ong ba kiba bun ki paidbah ki la ong ba utei u nongkynthoh u don ïa ka hok ban kren katkum ka riti synshar jong ka Ri India. Ka seng ka la ong ba ki lah ban kren bad pynsngew ïa kaei kaba ki don ban pynsngew hynrei kino-kino ki briew kim lah ban kren palat pud kaba lah pat ban pynjah burom lane kaba shu thaw da ki lad ki lynti ban pynjah burom bad ban pynduh mynsiem ïa kaei-kaei kaba ki briew ki trei shitom na ka bynta ka jingbha jong ki paidbah.
Ka seng ka la ong ruh ïa utei u nongkynthoh ba lada u kwah ïa ka jingshisha, u lah ban wan mih sha ka shlem treikam jong ka HANM bad ka seng kan sa ai ïa ka jingshisha.
“Phin nym lah ban shu wan bad ban kynnoh ïa ngi ïa kaei kaba phim lah ban pynshisha, phi don ïa ka hok ban kren katkum ka hok kaba don hapoh ka riti synshar ka ri hynrei phim lah pat ban pynjah burom lane ban shu beiñ shu khoh haduh ba kiwei-kiwei kin sngew ba ka jingtrei shitom jong ki ban wanrah ïa ka jingbha ka jingsuk kan shu duh ei noh kumta”, la ong ka seng.
Na ka liang u Vice President ka HANM, Bah Bawan Nongsiej, u la ong ba ka jingkynthoh jong utei u briew ïa ka seng ka long ba ka jingleit jong ka seng ban ïakhih ha Jantar Mantar ha ka 3 tarik u Naiwieng 2023 ka long ban pynthut ïa ka jingithuh noh ïa ka ktien Khasi ha ka khyrnit baphra jong ka riti synshar ka Ri.
U Bah Bawan u la ong ba kaba pynlyngngoh ïa ka seng ka long ba utei u briew u la kynnoh ba ha ka jingleit jong ka seng HANM ban dawa ïa lai tylli ki mat kiba ka seng ka la leit ban dawa ka dei kaba la bei tyngka da ka NPP.
“Na ka liang jong ka seng, ka kwah ba une u briew u dei ban pynshai ba hato ka dei shisha ne em ba ka NPP ka la bei tyngka ïa ka HANM ha ka jingleit jong ngi shathie”, la ong u Bah Bawan.
U Bah Bawan u la ong ba ka seng ka khlem ïoh jingnoh synñiang nangno-nangno hynrei ka dei da ka ram kaba dang sah wat haduh kine ki sngi ruh ka seng kam pat lah ban siew.
“Kane ka jingkynnoh jong une u briew ka long ban pynnoh mynsiem ïa ki sengbhalang kiba trei shitom bad na ka liang ka seng ka maham ruh ïa une u briew ba nangne shakhmat um dei shuh ban mlien ka kynthoh bad kumjuh ruh ïa kiwei pat kiba ju mlien ban kynthoh ha ki ‘social media’ ïa kiwei ki seng ruh kiba trei shitom”, la ong u Bah Bawan.
Shuh shuh u Bah Bawan u la ong ba na ka liang ka tnad pulit ka dei ban kem mardor ïa utei u briew bad ban leh ïa kaba donkam.
