Shillong, Lber 01
Ka Sorkar Pdeng kan pynlut T. 15 klur na ka bynta 5 tylli ki Jylla ban thied ïa ki jingsong ban song ïa u khaw ban sam lyngba ka Pradhan Mantri Garib Kalyan Anna Yojana (PMGKAY) sha ki paidbah kiba dei ki nongïoh myntoi.
Kine jingsong khaw kin don lang ka shap jong u Myntri Rangbahduh ka ri, u Narendra Modi ban phah sha ka Food Corporation of India (FCI) ban sam ïa u khaw hapoh ka skhim PMGKAY sha ki san tylli ki Jylla kiba kynthup ïa ka Rajasthan, Sikkim, Mizoram, Tripura, bad Meghalaya.
Kane ka jingthied ïa ki jingsong khaw ka paw lyngba ka jingwad jingtip jong u nongwad jingtip u Ajay Bose lyngba ka aiñ Right to Information (RTI) kaba la pan jingtip na ka FCI.
La ong ba hapoh ka skhim PMGKAY, la ju sam ei ïa u khaw sha kiba ïoh myntoi kiba hap hapoh ka Antyodaya Anna Yojana (AAY) bad Priority Households (PHH).
La ïathuh ba ka FCI ha Rajasthan ka la pan kumba 1.07 klur tylli ki jingsong bad kawei ka jingsong ka ngiam ban thep 10 kilo u khaw bad ka dor kawei ka jingsong ka long T. 12.375 kawei bad ka jinglut baroh ka long T. 13.29 klur.
Ha Meghalaya, ïa ka jingsong khaw yn donkam ban thied kumba 4.22 lak tylli ha ka dor `12.5 kawei ha kaba yn pynpoi ïa ki jingsong da ka kompani Plascom Industries LLP ha kaba yn pynlut `52.75 lak.
Kawei pat ka kompani, S.S.S. Services ka la ïoh ïa ka ‘tender’ ban pynpoi ïa ki jingsong khaw sha Mizoram bad Tripura ha ka dor kaba kham rem kaba long T. 14.3 kawei. Ka FCI Regional Office ha Shillong ka ïathuh ba ka Mizoram kan donkam 1.75 lak tylli ki jingsong khaw ba don ka shap u Modi ha ka jinglut kaba T. 25 lak katba ka Tripura kan pynlut T. 85.51 lak ban thied 5.98 lak tylli ki jingsong ban song ïa u khaw.
Ha Sikkim pat, ka kompani Injecto Polymers Pvt. Ltd kan pynpoi ïa ki jingsong khaw tangba kan kham shimpor namarba dang shna ïa kine ki jingsong. Ka FCI kan thied 98,000 tylli ki jingsong ha ka dor T. 14.65 kawei bad ha ka jinglut kaba T. 14.35 lak.
